Rupee Vs Dollar: இந்திய ரூபாய் மதிப்பு வரலாறு காணாத வீழ்ச்சி!

அமெரிக்க டாலருக்கு நிகரான இந்திய ரூபாயின் மதிப்பு அண்மைக்காலமாக தொடர்ந்து சரிந்துகொண்டே வருகிறது. இந்நிலையில், இன்று முதல்முறையாக டாலருக்கு நிகரான இந்திய ரூபாய் மதிப்பு 78 ரூபாய் அளவுக்கு மிக கடுமையாக சரிந்துள்ளது. இது வரலாறு காணாத வீழ்ச்சியாகும்.

வெளிநாட்டு முதலீட்டாளர்கள் தொடர்ந்து பங்குகளை விற்பனை செய்து வருவதால் இன்று பங்கு சந்தையில் பயங்கரமாக சரிந்துள்ளது. இன்று பங்கு வர்த்தகம் தொடங்கியபின் சென்செக்ஸ் 1400 புள்ளிகளும், நிப்டி 400 புள்ளிகளுக்கு மேலும் சரிந்தன.

சர்வதேச சூழ்நிலை சரியில்லாததாலும், ஆசிய மற்றும் ஐரோப்பிய நாணயங்கள் வலுவிழந்து காணப்படுவதாலும் இன்று வர்த்தகத்தில் இந்திய ரூபாய் மதிப்பு கடுமையாக சரிந்துள்ளது. இன்று வர்த்தகத்தில் அமெரிக்க டாலருக்கு நிகரான ரூபாய் மதிப்பு அதிகபட்சமாக 78.30 அளவுக்கு சரிந்துள்ளது.

பங்குகள் Vs மியூச்சுவல் ஃபண்ட்.. எது சிறந்த முதலீடு?
வரலாற்றிலேயே டாலருக்கு நிகரான இந்திய ரூபாய் மதிப்பு 78க்கு மேல் சரிவது இதுவே முதல்முறை. இதை சமாளிக்க ரிசர்வ் வங்கி என்னென்ன நடவடிக்கைகள் எடுக்கும் என்பது பெரும் எதிர்பார்ப்பாக உள்ளது. இதுபோக, இந்தியாவின் பணவீக்க விவரங்களை அரசு இன்று வெளியிடவுள்ளது.

அமெரிக்காவில் மே மாதத்தில் பணவீக்கம் 8.6 விழுக்காடாக இருந்துள்ளது. இந்தியாவில் பணவீக்கத்தை சமாளிக்க அரசும், ரிசர்வ் வங்கியும் சில நடவடிக்கைகளை எடுத்துள்ளன. இதனால் பலன் கிடைக்குமா அல்லது பணவீக்கம் உயர்ந்துள்ளதா என்பது மிகப்பெரிய எதிர்பார்ப்பாக உள்ளது.

அமெரிக்காவில் பணவீக்கத்தை சமாளிக்க ஃபெடரல் ரிசர்வ் வங்கி வட்டி விகிதத்தை உயர்த்தும் என எதிர்பார்க்கப்படுகிறது. இதுகுறித்த அறிவிப்பு இந்த வாரம் வெளியாகவுள்ளது.