இந்த வாரம் 4 நாட்களுக்கு பங்கு சந்தை மூடப்படும்.. வரிசையாக வரும் விடுமுறை!

Stock Market Holidays: இந்த வாரத்தில் கூடுதலாக இரண்டு நாட்களுக்கு இந்திய பங்கு சந்தைகள் மூடப்பட்டிருக்கும். இதன்படி, இந்த வாரம் நான்கு நாட்களுக்கு பங்கு சந்தைகளில் வர்த்தகம் நடைபெறாது.

பங்கு வர்த்தகம் நடைபெறுவதற்கும், முதலீடு செய்வதற்கும், வெளிநாட்டு முதலீடுகளை பெறுவதற்கும் பங்கு சந்தைகள் அவசியம் தேவைப்படுகின்றன. வழக்கமாக ஒவ்வொரு வாரமும் சனி, ஞாயிறு கிழமைகளில் பங்கு சந்தைகளுக்கு விடுமுறை விடுக்கப்படும்.

இதுபோக, பொது விடுமுறை நாட்கள், பண்டிகை நாட்களிலும் பங்கு சந்தைகளுக்கு விடுமுறை விடுக்கப்படும். அவ்வகையில் இந்த வாரம் நான்கு நாட்களுக்கு பங்கு சந்தைகள் இயங்காது.

முதலில் நாளை ஏப்ரல் 4ஆம் தேதி மகாவீரர் ஜெயந்திக்கு பங்கு சந்தைகளுக்கு விடுமுறை. அடுத்து ஏப்ரல் 7ஆம் தேதி புனித வெள்ளி விடுமுறை அன்று பங்கு சந்தைகள் இயங்காது. அதன்பிறகு ஏப்ரல் 8 சனி கிழமை, ஏப்ரல் 9 ஞாயிற்றுக்கிழமை ஆகிய இரண்டு நாட்களும் பங்கு சந்தைகள் இயங்காது.

வெள்ளி முதல் ஞாயிறு வரை தொடர்ந்து மூன்று நாட்களுக்கு இந்திய பங்கு சந்தைகள் இயங்காது.

விடுமுறை நாட்கள்:

ஏப்ரல் 4 - மகாவீரர் ஜெயந்தி

ஏப்ரல் 7 - புனித வெள்ளி

ஏப்ரல் 8 - சனி கிழமை

ஏப்ரல் 9 - ஞாயிறு

மேற்கூறியபடி ஏப்ரல் 4, ஏப்ரல் 7ஆம் தேதிகளில் பங்கு வர்த்தகம், டெரிவேட்டிவ் வர்த்தகம், கரன்சி டெரிவேடிவ், SLB, வட்டி டெரிவேடிவ் வர்த்தகம் நடைபெறாது.

ஏப்ரல் 4ஆம் தேதி சரக்கு சந்தையான MCX சந்தையில் காலை வர்த்தகம் நடைபெறாது. எனினும், மாலை அமர்வு 5 மணி முதல் வர்த்தகம் நடைபெறும். ஏப்ரல் 7ஆம் தேதி காலை அமர்வு, மாலை அமர்வு இரண்டிலுமே வர்த்தகம் நடைபெறாது.

வரும் ஏப்ரல் 14ஆம் தேதியும் அம்பேத்கர் ஜெயந்தி நாளில் பங்கு சந்தைகள் இயங்காது.