2000 ரூபாய் இருந்தாலும் செலவு செய்ய முடியல.. திணறும் இந்தியர்கள்!

புழக்கத்தில் இருந்து 2000 ரூபாய் நோட்டுகளை திரும்ப பெறுவதாக மே 19ஆம் தேதி ரிசர்வ் வங்கி அறிவித்தது. செப்டம்பர் 30ஆம் தேதி வரை மக்கள் தங்களிடம் உள்ள 2000 ரூபாய் நோட்டுகளை வங்கிகளில் கொடுத்து மாற்றிக்கொள்ளலாம் என ரிசர்வ் வங்கி தெரிவித்துள்ளது.

இதுமட்டுமல்லாமல், 2000 ரூபாய் நோட்டுகள் தொடர்ந்து பணமாக செல்லுபடியாகும் எனவும், மக்கள் 2000 ரூபாய் நோட்டை பயன்படுத்தி பொருட்கள் மற்றும் சேவைகளை வாங்கலாம் எனவும் ரிசர்வ் வங்கி தெரிவித்துள்ளது. கடைக்காரர்கள் 2000 ரூபாய் நோட்டுகளை வாங்க மறுக்கக்கூடாது எனவும் ரிசர்வ் வங்கி ஆளுநர் சக்திகந்தா தாஸ் தெரிவித்துள்ளார்.

2000 ரூபாய் நோட்டுகள் தொடர்ந்து செல்லுபடியாகும் என ரிசர்வ் வங்கி தெரிவித்தாலும் கூட, இந்தியர்கள் தங்களிடம் உள்ள 2000 ரூபாய் நோட்டுகளை செலவு செய்ய முடியாமல் திணறி வருவதாக LocalCircles நிறுவனம் நடத்திய சர்வே மூலம் தெரியவந்துள்ளது.

மக்கள் தங்களிடம் உள்ள 2000 ரூபாய் நோட்டுகளை வங்கிகளில் மாற்றிக்கொள்ளலாம் எல்லது வங்கி கணக்கில் டெபாசிட் செய்துகொள்ளலாம். எனினும், பலரும் தங்களது 2000 ரூபாய் நோட்டுகளை செலவு செய்வதற்கே விரும்புவதாக இந்த சர்வே கூறுகிறது.

இருப்பினும் 2000 ரூபாய் நோட்டுகளை பல்வேறு வியாபாரிகள் ஏற்றுக்கொள்வதில்லை என இந்த சர்வேயில் பங்கேற்றவர்கள் குறை தெரிவிக்கின்றனர். 91 சதவீதம் பேர் தங்களிடம் இருந்த 2000 ரூபாய் நோட்டை செலவு செய்ய முடியாமல் தவித்ததாக இந்த சர்வேயில் தெரிவித்துள்ளனர்.

சூப்பர்மார்க்கெட்டுகள், ஸ்டோர்கள், மருந்து கடைகள், மருத்துவமனைகள், பெட்ரோல் நிலையங்களிலும் கூட 2000 ரூபாய் நோட்டுகள் ஏற்கப்படுவதில்லை என இந்த சர்வேயில் பங்கேற்றவர்கள் தெரிவித்துள்ளனர்.

இந்த சர்வேயில் பங்கேற்றவர்களில் 15 சதவீதம் பேர் தங்களிடம் 20,000 ரூபாய் வரை 2000 ரூபாய் நோட்டுகள் இருப்பதாக தெரிவித்துள்ளனர். 7 சதவீதம் பேர் 40,000 ரூபாய் வரை 2000 ரூபாய் நோட்டுகளாக இருப்பதாக தெரிவித்துள்ளனர்.

6 சதவீதம் பேர் 1 லட்சம் ரூபாய் அல்லது அதற்கு மேல் 2000 ரூபாய் நோட்டுகளாக இருப்பதாக தெரிவித்துள்ளனர். 2 சதவீதம் பேர் 10 லட்சம் ரூபாய் வரையிலும், இன்னொரு 2 சதவீதம் பேர் 10 லட்சம் ரூபாய்க்கு மேல் 2000 ரூபாய் நோட்டுகளாக வைத்திருப்பதாக தெரிவித்துள்ளனர்.