Forex reserves: இந்தியாவின் அந்நிய செலாவணி கையிருப்பு கிடுகிடு உயர்வு!

முந்தைய வாரத்தில் இந்தியாவின் அந்நிய செலாவணி கையிருப்பு கணிசமாக உயர்ந்துள்ளதாக ரிசர்வ் வங்கி வெளியிட்டுள்ள தகவல் வாயிலாக தெரியவந்துள்ளது.

ஜூலை 13ஆம் தேதியுடன் முடிவடைந்த வாரத்தில் இந்தியாவின் அந்நிய செலாவணி கையிருப்பு 10.417 பில்லியன் டாலர் அதிகரித்து 572 பில்லியன் டாலராக உயர்ந்துள்ளது என ரிசர்வ் வங்கி வெளியிட்டுள்ள வாராந்திர புள்ளிவிவர குறிப்பில் தெரிவித்துள்ளது.

ஒரே வாரத்தில் இந்தியாவின் அந்நிய செலாவணி கையிருப்பு 10 பில்லியன் டாலருக்கு மேல் உயர்ந்தது மட்டுமல்லாமல், அந்நிய செலாவணி கையிருப்பு ஐந்து மாத உச்சத்தையும் தொட்டுள்ளது. ஜனவரி 6ஆம் தேதியுடன் முடிவடைந்த வாரத்தில் இந்தியாவின் அந்நிய செலாவணி கையிருப்பு 561.583 பில்லியன் டாலராக இருந்தது குறிப்பிடத்தக்கது.

15000 கோடி ரூபாய் காலி.. வண்டியை கட்டும் வெளிநாட்டு முதலீட்டாளர்கள்!
அந்நிய செலாவணி கையிருப்பில் அந்நிய நாணய சொத்துகள் (Foreign currency assets) பெரும்பங்கு வகிக்கின்றன. அந்நிய நாணய சொத்துகள் என்பது அமெரிக்க டாலர், யூரோ, யென் போன்ற வெளிநாட்டு நாணயங்கள் ஆகும்.

ஜனவரி 13ஆம் தேதியுடன் முடிவடைந்த வாரத்தில் இந்தியாவின் அந்நிய நாணய சொத்துகள் 9.078 பில்லியன் டாலர் அதிகரித்து 505.519 பில்லியன் டாலராக உயர்ந்துள்ளது. இதுபோக தங்கம் கையிருப்பு 42.890 பில்லியன் டாலராக உயர்ந்துள்ளது.

2022ஆம் ஆண்டு தொடக்கத்தில் இந்தியாவின் அந்நிய செலாவணி கையிருப்பு சுமார் 633 பில்லியன் டாலராக இருந்தது. பின்னர், அமெரிக்க டாலருக்கு நிகரான இந்திய ரூபாய் மதிப்பு சரிவதை தடுப்பதற்காக நிறைய டாலரை ரிசர்வ் வங்கி விற்பனை செய்தது.

இதனால், இந்தியாவின் அந்நிய செலாவணி கையிருப்பும் சரிந்துகொண்டே வந்தது. இந்நிலையில், கடந்த சில வாரங்களாக மீண்டும் இந்தியாவின் அந்நிய செலாவணி கையிருப்பு உயர்ந்து வருகிறது.