IKEA: திருப்பதி தரிசனமும் இல்லை.. எம்.எல்.ஏக்கள் கூட்டமும் இல்லை.. ஸ்தம்பித்த ஐகியா ஸ்டோர்!

நெதர்லாந்தை சேர்ந்த ஃபர்னிச்சர் நிறுவனமான ஐகியாவுக்கு இந்தியாவில் ஹைதராபாத், நவி மும்பை, வொர்லி ஆகிய இடங்களில் ஸ்டோர் உள்ளது. இந்நிலையில், தனது நான்காவது ஸ்டோரை கடந்த ஜூன் 22ஆம் தேதி பெங்களூருவில் உள்ள நாகசந்திராவில் திறந்தது ஐகியா நிறுவனம்.

இந்தியாவில் ஐகியாவின் மிகப்பெரிய ஸ்டோரும் இதுவே. 12.2 ஏக்கர் பரப்பளவில் அமைந்துள்ள இந்த பிரம்மாண்ட ஸ்டோரில் 7000க்கும் மேற்பட்ட ஹோம் ஃபர்னிஷிங் பொருட்கள் விற்பனை செய்யப்படுகின்றன. இதுபோக குழந்தைகள் விளையாடுவதற்கான தளம், மிகப்பெரிய உணவகம் என பல்வேறு அம்சங்கள் உள்ளன.

இந்த ஸ்டோர் திறக்கப்பட்ட நாளிலேயே அனைவரையும் வெகுவாக கவர்ந்தது. முதல் நாளிலேயே ஐகியா ஸ்டோரில் ஏராளமானோர் கூட்டமாக திரண்டு அலை மோதினர். பல வாடிக்கையாளர்கள் கிட்டத்தட்ட 3 மணி நேரம் காத்திருந்து பொருட்களை வாங்கிச் சென்றதாகவும் கூறுகின்றனர்.

IKEA Bengaluru: ஐகியாவின் பிரம்மாண்ட ஸ்டோர்.. இவ்வளவு வசதிகள் இருக்கா!
ஐகியாவில் கூடிய கூட்டம் நெட்டிசன்களை மட்டுமல்லாமல் தொழிலதிபர்களையும் அதிர்ச்சியடைய செய்துள்ளது. ஐகியா ஸ்டோரில் வாடிக்கையாளர்கள் கூட்டம் அலைமோதும் வீடியோவை தொழிலதிபரும் ஆர்பிஜி குழுமத்தின் தலைவருமான ஹர்ஷ் கோயங்கா ட்விட்டரில் பகிர்ந்துள்ளார்.

இதுகுறித்து அவர், “இது மகாராஷ்டிராவில் ஆட்சி அமைக்க வரிசையில் நிற்கும் எம்.எல்.ஏக்கள் கூட்டமும் இல்லை. நம் நாட்டுக்குள் நுழைவதற்காக விமான நிலையத்தில் நிற்கும் கூட்டமுமில்லை.

கொரோனாவை தடுக்க தடுப்பூசி போடுவதற்கான கூட்டமும் இல்லை. திருப்பதியில் தரிசனத்துக்காக காத்திருக்கும் பக்தர்கள் கூட்டமுமில்லை. பெங்களூருவில் ஐகியா ஸ்டோர் திறப்பின்போது கூடிய கூட்டம் இது” என்று தெரிவித்துள்ளார்.