Infosys CEO சலில் பரேக் சம்பளம் குறைவு.. காரணம் இதுதான்!

இன்ஃபோசிஸ் நிறுவனத்தின் CEO சலில் பரேக்கின் சம்பளம் கடந்த நிதியாண்டில் 21 சதவீதம் குறைந்துள்ளதாக தகவல் வெளியாகியுள்ளது.

இந்தியாவின் இரண்டாவது மிகப்பெரிய ஐடி நிறுவனம் இன்ஃபோசிஸ். இந்நிறுவனத்தின் தலைமை செயல் அலுவலகராக (CEO) சலில் பரேக் பதவி வகித்து வருகிறார். இந்தியாவில் மிக அதிக சம்பளம் பெறும் தலைமை செயல் அலுவலர்களில் சலில் பரேக்கும் முன்னிலையில் இருக்கிறார்.

இந்நிலையில், கடந்த 2022-23ஆம் நிதியாண்டில் சலில் பரேக்கின் சம்பளம் 21 சதவீதம் குறைந்து 56.44 கோடி ரூபாயாக குறைந்துள்ளது என இன்ஃபோசிஸ் நிறுவனம் வெளியிட்டுள்ள ஆண்டறிக்கை வாயிலாக தெரிய வருகிறது. முந்தைய 2021-22ஆம் நிதியாண்டில் சலில் பரேக் 71 கோடி ரூபாய் சம்பளம் பெற்றது குறிப்பிடத்தக்கது.

சலில் பரேக் சம்பளம் குறைந்ததற்கு காரணம் என்ன?

உண்மையை சொன்னால், சலில் பரேக்கிற்கு வழங்கப்பட்ட சம்பளத் தொகை குறையவில்லை. மாறாக, அவருக்கு வழங்கப்பட்ட பங்குகளின் மதிப்பு மட்டுமே குறைந்துள்ளது. முந்தைய ஆண்டை காட்டிலும் குறைவான பங்குகளையே சலில் பரேக் பெற்றுள்ளார்.

பொதுவாகவே பெரு நிறுவனங்களின் தலைமை செயல் அலுவலகர்களுக்கு சம்பளம் என்பது பெரிய தொகை இல்லை. மாறாக அவர்களுக்கு வழங்கப்படும் பங்குகள், போனஸ் போன்றவைதான் மிகப்பெரிய தொகையாக இருக்கின்றன.

அவ்வகையில், 2022-23ஆம் நிதியாண்டில் சலில் பரேக்கிற்கு வழங்கப்பட்ட பங்குகளின் மதிப்பு குறைந்துள்ளது. சலில் பரேக்கிற்கு வழங்கப்பட்ட மொத்த சம்பளத்தில் சம்பளத் தொகை, variable pay, பணி ஓய்வு பலன்கள், பங்குகள் போன்றவை அடங்கும்.

2022-23ஆம் நிதியாண்டில் சலில் பரேக்கிற்கான variable pay தொகை 6 கோடி ரூபாயாக உயர்ந்துள்ளது குறிப்பிடத்தக்கது.