பெரிய மீனை பிடித்த இன்ஃபோசிஸ்.. ஒரே டீலில் 1.5 பில்லியன் டாலர்!

எண்ணெய் நிறுவனமான பிபி (BP) நிறுவனத்திடம் 1.5 பில்லியன் டாலருக்கான ஒப்பந்தத்தை இன்ஃபோசிஸ் (Infosys) நிறுவனம் கைப்பற்றியுள்ளது.

இந்தியாவின் இரண்டாவது மிகப்பெரிய ஐடி நிறுவனமான இன்ஃபோசிஸ், இங்கிலாந்தை சேர்ந்த எண்ணெய் நிறுவனமான பிபி நிறுவனத்திடம் இருந்து ஐடி சேவைகளுக்காக 1.5 பில்லியன் டாலர் மதிப்புள்ள ஒப்பந்தத்தை பெற்றுள்ளது.

இந்த ஒப்பந்தம் இன்ஃபோசிஸ் நிறுவனத்துக்கு மிக முக்கியமானதாக பார்க்கப்படுகிறது. ஏனெனில் 2020ஆம் ஆண்டில் டைம்லர் நிறுவனத்திடம் இன்ஃபோசிஸ் நிறுவனம் பெரிய ஒப்பந்தத்தை கைப்பற்றியது. அதன் பின் இன்ஃபோசிஸ் நிறுவனம் மிகப்பெரிய ஒப்பந்தங்கள் எதுவும் கைப்பற்றவில்லை. இரண்டு ஆண்டுகளுக்கு பின் தற்போதுதான் இந்த பெரிய ஒப்பந்தத்தை இன்ஃபோசிஸ் நிறுவனம் கைப்பற்றியுள்ளது.

இதுமட்டுமல்லாமல் உலகளவில் பொருளாதார மந்தநிலை அச்சம் நிலவி வருவதால், அமெரிக்க மற்றும் ஐரோப்பிய நாடுகளை சேர்ந்த நிறுவனங்கள் தங்களது செலவுகளை குறைத்து வருகின்றன. இதனால் இந்திய ஐடி நிறுவனங்கள் மேற்கு நாடுகளில் ஒப்பந்தங்களை பெறுவது சவாலாகியுள்ளது.

கடந்த மார்ச் காலாண்டு முடிவுகளை இன்ஃபோசிஸ் நிறுவனம் அண்மையில் வெளியிட்டது. அதில், இன்ஃபோசிஸ் நிறுவனத்தின் வருமானம் திருப்திகரமாக இல்லை. இதனால் இன்ஃபோசிஸ் மட்டுமல்லாமல் இந்திய ஐடி நிறுவனங்களின் பங்குகள் கடுமையாக சரிந்துவிட்டன.

ஐடி நிறுவனங்களுக்கு பொருளாதார சூழல் சாதகமாக இல்லாத நிலையில் இன்ஃபோசிஸ் நிறுவனம் 1.5 பில்லியன் டாலர் மதிப்புள்ள மிகப்பெரிய ஒப்பந்தத்தை பிபி நிறுவனத்திடம் இருந்து கைப்பற்றியுள்ளது முக்கியத்துவம் வாய்ந்ததாக கருதப்படுகிறது.

இந்த ஒப்பந்தத்தின்படி இங்கிலாந்தை சேர்ந்த எண்ணெய் நிறுவனமான பிபி-க்கு development, modernisation, management, maintenance உள்ளிட்ட ஐடி சேவைகளை இன்ஃபோசிஸ் நிறுவனம் வழங்க இருக்கிறது.

இன்ஃபோசிஸ் நிறுவனம் இவ்வளவு பெரிய ஒப்பந்தத்தை பெற்றாலும் கூட இன்று பங்கு வர்த்தகத்தின்போது இன்ஃபோசிஸ் பங்கு விலை 1 சதவீதம் மேல் சரிந்துள்ளது.