அடிச்சு ஆடும் ஐடிசி பங்கு.. லாபத்தில் முதலீட்டாளர்கள்.. இப்போதும் வாங்கலாமா?

ஐடிசி பங்கு (ITC share) தொடர் ஏற்றத்தின் வரிசையில் இன்று புதிய உச்சத்தை தொட்டுள்ளது. இப்போது ஐடிசி பங்கை வாங்குவதற்கு சரியான நேரமா?

2023ஆம் ஆண்டு தொடங்கி பங்கு சந்தை பெரிதாக ஏற்றம் அடையவில்லை. சொல்லப்போனால் அண்மையில் பங்கு சந்தை கடுமையாக சரிந்தது. பொருளாதார சூழலும் சாதகமாக இல்லாததால் பங்கு சந்தை மேலும் இறங்கும் என்ற அச்சமே நீடித்து வருகிறது.

ஐடி நிறுவனங்கள் கூட திருப்திகரமான லாபம் ஈட்டாததால் ஐடி பங்குகள் சரிந்துள்ளன. பெரும்பாலான முக்கிய பங்குகள் ஏற்ற இறக்கத்துடன் காணப்படுகின்றன. ஆனால், ஐடிசி பங்கு மட்டும் சந்தை இறக்கங்களுக்கு அடங்காமல் தொடர்ந்து உயர்ந்து வருகிறது.

ஐடிசி பங்கு தொடர்ந்து ஏற்றம் அடைவது மட்டுமல்லாமல் புதிய புதிய உச்சங்களை தொட்டு வருகிறது. இன்றும் கூட ஐடிசி பங்கு விலை 402.65 ரூபாய் என்ற புதிய உச்சத்தை தொட்டுள்ளது. நடப்பு 2023ஆம் ஆண்டில் மட்டும் ஐடிசி பங்கு சுமார் 22% மேல் உயர்ந்துள்ளது.

கடந்த ஒரு ஆண்டில் ஐடிசி பங்கு விலை சுமார் 55% உயர்ந்துள்ளது. குறிப்பாக பிப்ரவரி 1ஆம் தேதி மத்திய பட்ஜெட் தாக்கல் செய்யப்பட்ட நாளில் இருந்து ஐடிசி பங்கு விலை கட்டுக்கடங்காமல் உயர்ந்து வருகிறது. இதனால் பங்குதாரர்கள் நல்ல லாபம் அடைந்துள்ளனர்.

ஐடிசி நிறுவனம் பிரதானமாக சிகரெட் தொழில் செய்து வருகிறது. இதுபோக FMCG, ஐடி, ஹோட்டல், பேக்கேஜிங், விவசாயம், பேப்பர் போன்ற பல தரப்பட்ட தொழில்களையும் ஐடிசி நிறுவனம் செய்து வருகிறது.

ஐடிசி பங்குக்கு ICICI Direct நிறுவனம் 'BUY' ரேட்டிங் கொடுத்துள்ளது. மேலும், ஐடிசி பங்குக்கு 450 ரூபாய் டார்கெட் விலையை பரிந்துரைத்துள்ளது.

Axis Securities நிறுவனமும் ஐடிசி பங்குக்கு 'BUY'ரேட்டிங் கொடுத்துள்ளது. மார்ச் காலாண்டில் ஐடிசி நிறுவனத்தின் சிகரெட் தொழில் 16% வளர்ச்சி அடையும் என ஆக்ஸிஸ் செக்யூரிட்டிஸ் நிறுவனம் எதிர்பார்ப்பு தெரிவித்துள்ளது.