இந்தியாவுக்கு ரூ.2288 கோடி கடன்.. பச்சைக் கொடி காட்டிய ஜப்பான்!

இந்தியாவில் இரண்டு திட்டங்களுக்காக 2288 கோடி ரூபாய் கடன் வழங்குவதற்கு ஜப்பான் ஒப்புதல் அளித்துள்ளது.

மும்பையில் ட்ரான்ஸ் ஹார்பர் இணைப்பு திட்டத்துக்கும் (Mumbai Trans-Harbour Link), மிசோரம் மாநிலத்தில் புற்றுநோய் சிறப்பு மருத்துவமனை அமைப்பதற்கும் 2,288 கோடி ரூபாய் கடன் வழங்குவதற்கு ஜப்பான் ஒப்புதல் அளித்துள்ளது.

இதன்படி, மும்பை ட்ரான்ஸ் ஹார்பர் இணைப்பு திட்டத்துக்கு 30.755 பில்லியன் ஜப்பானிய யென் கடன் வழங்குவதற்கு ஒப்புதல் அளிக்கப்பட்டுள்ளது. இந்திய ரூபாய் மதிப்பில் 30.755 பில்லியன் யென் என்பது 1,728 கோடி ரூபாய்.

இதுபோக, மிசோரம் மாநிலத்தில் புற்றுநோய் சிறப்பு மருத்துவமனை மற்றும் ஆய்வு மையம் அமைப்பதற்கு 9.918 பில்லியன் யென் கடன் வழங்கவும் ஜப்பான் ஒப்புதல் அளித்துள்ளது. இந்திய ரூபாய் மதிப்பில் 9.918 பில்லியன் யென் என்பது 560 கோடி ரூபாய்.

ஆக மொத்தம் இந்த இரண்டு திட்டங்களுக்கும் 2,288 கோடி ரூபாய் கடன் வழங்குகிறது ஜப்பான். மும்பை ட்ரான்ஸ் ஹார்பர் இணைப்பு திட்டம் என்பது மும்பை பெருநகர் பகுதியை நவி மும்பை பகுதியுடன் இணைப்பதற்கான சாலை திட்டம் ஆகும். போக்குவரத்து நெரிசலை குறைக்கவும், போக்குவரத்தை வேகப்படுத்தவும் இத்திட்டம் அறிவிக்கப்பட்டுள்ளது.

மிசோரம் மாநிலத்தில் அமைக்கப்படும் சூப்பர் ஸ்பெஷாலிட்டி புற்றுநோய் மருத்துவமனை மற்றும் ஆய்வு மையம் அம்மாநிலத்தில் புற்றுநோய் தடுப்பை மேம்படுத்தவும், நோய் கண்டறிதல் மற்றும் சிகிச்சை வசதிகளை அதிகரிக்கவும் கொண்டுவரப்படுகிறது.

இந்நிலையில், இந்த இரண்டு திட்டங்களுக்காகவும் 2,288 கோடி ரூபாய் கடன் வழங்க ஜப்பான் பச்சைக் கொடி காட்டியுள்ளது.