ஐடி நிறுவனங்களில் 91,000 பேருக்கு வேலை... நீங்க ரெடியா?

இந்தியாவில் கடந்த சில ஆண்டுகளாகவே தகவல் தொழில்நுட்பத் துறை (ஐடி) மந்தமான நிலையில் இயங்கிக் கொண்டிருக்கிறது. வாருவாய் இழப்பு, பணிநீக்கம் போன்ற பிரச்சினைகள் நீடிக்கின்றன. போதாத குறைக்கு கொரோனா வந்த பிறகு நிலைமை இன்னும் மோசமாகிவிட்டது. ஐடி நிறுவனங்கள் கொரோனா ஊரடங்கு காலத்தில் பெரும்பாலான தங்களது ஊழியர்களை வீட்டிலிருந்தே வேலை பார்க்க அனுமதித்திருந்தாலும் கட்டாய ஓய்வு, சம்பளக் குறைப்பு போன்ற அதிரடி நடவடிக்கைகள் மேற்கொள்ளப்பட்டன. ஊழியர்கள் பலர் தங்களது வேலையை இழந்து வேறு துறைகளுக்கு மாறவும், சுய தொழில் செய்யவும் ஆயத்தமாகினர்.

இதுபோன்ற சூழலில், அடுத்து வரும் நாட்களில் ஐடி துறையில் வேலைவாய்ப்புகள் கொட்டிக் கிடப்பதாகத் தகவல் வெளியாகியுள்ளது. ஊரடங்கு தளர்ந்துள்ள நிலையில் ஐடி சேவைகளுக்கான தேவை அதிகரித்து வருவதால் ஐடி நிறுவனங்கள் வேலைவாய்ப்புகளை வழங்குவதில் மும்முரமாக உள்ளன. 2021-22 நிதியாண்டில் அதிகப் பேருக்கு வேலைவாய்ப்பு வழங்கும் திட்டத்தில் நிறுவனங்கள் இருக்கின்றன. இந்தியாவின் நான்கு முன்னணி ஐடி நிறுவனங்களான டிசிஎஸ், இன்ஃபோசிஸ், ஹெச்சிஎல், விப்ரோ இணைந்து மொத்தம் 91,000 பேருக்கு வேலைவாய்ப்பு வழங்கத் திட்டமிட்டுள்ளதாகத் தெரிகிறது.

வருமான வரி: பட்ஜெட்டில் வரிச் சலுகை கிடைக்குமா?

சென்ற ஆண்டிலும் இதே அளவிலான எண்ணிக்கையில் வேலைவாய்ப்புகள் வழங்கப்பட்டன. நடப்பு நிதியாண்டில் கொரோனா பாதிப்பால் பெரும்பாலான நிறுவனங்கள் வளாக நேர்காணல்கள் வாயிலான பணியமர்த்தல்களை நிறுத்திவிட்டன. அடுத்த நிதியாண்டில் இதன் வாயிலாக அதிகப் பேருக்கு வேலைவாய்ப்பு கிடைக்கும் என்று எதிர்பார்க்கப்படுகிறது. சென்ற ஆண்டில் டிசிஎஸ் நிறுவனம் சுமார் 40,000 பேருக்கு வேலைவாய்ப்பு வழங்கியிருந்தது. 2021-22 நிதியாண்டிலும் இதே அளவிலான எண்ணிக்கையில் வேலைவாய்ப்புகள் வழங்கப்படும் என்று டிசிஎஸ் நிறுவனத்தின் துணைத் தலைவரான மிலிண்ட் லக்காட் தெரிவித்துள்ளார்.

இன்ஃபோசிஸ் நிறுவனத்தைப் பொறுத்தவரையில், சுமார் 24,000 பட்டதாரிகளுக்கு வேலை வழங்கத் திட்டமிட்டுள்ளது. சென்ற ஆண்டில் கிட்டத்தட்ட 15,000 பேருக்கு இந்நிறுவனம் வேலைவாய்ப்பு வழங்கியிருந்தது. ஹெச்சிஎல் நிறுவனமும் சுமார் 15,000 ஃபிரெஷர்களுக்கு வேலைவாய்ப்பு வழங்கும் முடிவில் உள்ளது.