தொழில் துறை உற்பத்தியைக் கெடுத்த கொரோனா!

மார்ச் மாதம் முதலே இந்தியாவில் கொரோனா வைரஸ் பிரச்சினை நீடித்து வருகிறது. கொரோனா பரவலைத் தடுக்க நாடு முழுவதும் ஊரடங்கு அமல்படுத்தப்பட்டதால் அனைத்துத் துறைகளிலும் உற்பத்தி மற்றும் இதர வர்த்தகம் முற்றிலும் முடங்கியது. ஊரடங்கு தளர்த்தப்பட்டு தொழில் நடவடிக்கைகள் மீண்டும் தொடங்கியிருந்தாலும் இன்னும் இயல்பு நிலை திரும்பவில்லை. அனைத்துத் துறைகளிலும் உற்பத்தி மந்தமாகவே இருக்கிறது. அரசு வெளியிட்டுள்ள அறிக்கையின்படி, சென்ற ஜூன் மாதத்தில் இந்தியாவின் தொழில் துறை உற்பத்தி 16.6 சதவீதம் வீழ்ச்சியடைந்துள்ளது.

உற்பத்தித் துறையில் 17.1 சதவீத வீழ்ச்சி ஏற்பட்டுள்ள நிலையில் மின்சாரத் துறையில் 10 சதவீதமும், சுரங்கத் துறையில் 19.8 சதவீதமும் வீழ்ச்சி ஏற்பட்டுள்ளது. சென்ற ஆண்டின் இதே காலத்தில் இருந்த அளவுடன் தற்போதைய புள்ளி விவரங்களை ஒப்பிடுவது சரியாக இருக்காதென்று மத்திய புள்ளியியல் மற்றும் திட்டமிடல் அமைச்சகம் தெரிவித்துள்ளது. வருடாந்திர அளவில் வீழ்ச்சி அதிகமாக இருந்தாலும் மாதாந்திர அடிப்படையில் நல்ல முன்னேற்றம் ஏற்பட்டுள்ளது. அதாவது, ஏப்ரல் மாதத்தில் 53.6 சதவீதமும், மே மாதத்தில் 89.5 சதவீதமும் உயர்ந்திருக்கிறது. ஜூன் மாதத்தில் 107.8 சதவீத வளர்ச்சி ஏற்பட்டுள்ளது.

100 நாள் வேலைத் திட்டம்: ஆகஸ்ட் வரை சம்பளம்!

ஆறுதல் தரும் செய்தியாக நுகர்வோர் சாதனங்கள் பிரிவில் மட்டும் 14 சதவீத வளர்ச்சி ஏற்பட்டுள்ளது. ஏப்ரல் - ஜூன் காலாண்டில் தொழில் துறை உற்பத்தியில் 35.9 சதவீத வீழ்ச்சி ஏற்பட்டுள்ளது. சென்ற ஆண்டின் இதே காலத்தில் 3 சதவீத வளர்ச்சி இருந்தது என்பது குறிப்பிடத்தக்கது. உற்பத்தி தொடங்கினாலும் தேவை குறைவு, விநியோகக் குறைபாடு போன்ற காரணங்களும் உள்ளதால் இந்த மாதத்திலும் தொழில் துறை உற்பத்தி மந்தமாகவே இருக்கும் என்று எதிர்பார்க்கப்படுகிறது.