சமையல் சிலிண்டர் டெலிவரி... இது இல்லனா டெலிவரி இல்லை!

வீட்டு உபயோகத்துக்கான சமையல் சிலிண்டர்கள் ஆர்டரின் பேரில் வீடுகளுக்கே வந்து டெலிவரி செய்யப்படுகின்றன. இதற்கான முன்பதிவுக்கு எஸ்.எம்.எஸ்., மிஸ்டு கால், மொபைல் ஆப் உள்ளிட்ட பல்வேறு வசதிகள் உள்ளன. இருந்தாலும், நவம்பர் 1ஆம் தேதி முதல் சிலிண்டர் டெலிவரிக்கான விதிமுறைகள் மாற்றப்பட்டுள்ளன. சிலிண்டர் டெலிவரி முறையில் பாதுகாப்பு அம்சத்தை மேம்படுத்துவதற்காக இந்தப் புதிய நடைமுறையை எண்ணெய் நிறுவனங்கள் கொண்டுவந்துள்ளன. இந்தப் புதிய நடைமுறை முதற்கட்டமாக 100 ஸ்மார்ட் நகரங்களில் செயல்பாட்டுக்கு வந்துள்ளது.

எல்பிஜி சிலிண்டர் ஹோம் டெலிவரியை தேர்வு செய்த வாடிக்கையாளர்களுக்கு சம்பந்தப்பட்ட சிலிண்டர் நிறுவனம் DAC code என்ற பாதுகாப்பு கோடு எண்ணை வழங்கும். உங்கள் மொபைலுக்கு வரும் ஓடிபி பாஸ்வோர்டை டெலிவரி பணியாளரிடம் தெரிவித்தால் மட்டுமே சிலிண்டர் வழங்கப்படும். பதிவு செய்யப்பட்ட மொபைல் எண்ணுக்கு மட்டுமே ஓடிபி பாஸ்வோர்ட் அனுப்பப்படும். புதிய நடைமுறைக்கு மாறாத வாடிக்கையாளர்கள் சிலிண்டர் ஆர்டர் செய்வதில் சிக்கல்களை சந்திக்க நேரிடும். வாடிக்கையாளர்களின் நலன் கருதி இண்டேன் சிலிண்டர்களுக்காக இந்தியன் ஆயில் நிறுவனம் 7718955555 என்ற 24 மணி நேர சேவை எண்ணை அறிமுகப்படுத்தியுள்ளது.

ஒருவேளை உங்களது மொபைல் எண் எரிவாயு விற்பனை நிறுவனத்துடன் பதிவு செய்யப்படவில்லை என்றாலோ அல்லது மொபைல் எண் மாறிவிட்டாலோ நீங்கள் அதை விநியோக சமயத்தில் புதுப்பிக்க முடியும். இதற்காக, டெலிவரி மேனிடம் ஒரு செயலி இருக்கும். டெலிவரி நேரத்தில் அந்த செயலியின் உதவியுடன் உங்களது மொபைல் எண்ணை நீங்கள் புதுப்பிக்கலாம். அந்த மொபைல் ஆப் மூலம் மொபைல் எண் நிகழ்நேர அடிப்படையில் புதுப்பிக்கப்படும். அதன் பின்னர் அதே எண்ணிலிருந்து ஓடிபியை உருவாக்க முடியும். சிலிண்டர் திருட்டு உள்ளிட்ட பல்வேறு பாதுகாப்பு பிரச்சினைகளைச் சரிசெய்யும் நோக்கத்தில்தான் இந்தப் புதிய நடைமுறை செயல்படுத்தப்பட்டுள்ளது.