வெறும் 2 பங்கு.. 18 மடங்கு லாபம்.. வாரன் பஃபெட் சம்பாதித்த சூட்சமம் இதுதான்!

அமெரிக்காவை சேர்ந்த வாரன் பஃபெட் (Warren Buffett) உலகளவில் மிகப்பெரிய வெற்றிகரமான முதலீட்டாளர்களில் ஒருவராக கருதப்படுகிறார். உலகின் முன்னணி பணக்காரர்களில் ஒருவராகவும் இருக்கிறார். உலகம் முழுவதும் பங்குச் சந்தை முதலீட்டில் சாதிக்க விரும்புவோருக்கு வாரன் பஃபெட் நம்பிக்கை நட்சத்திரமாக திகழ்கிறார்.

வாரன் பஃபெட்டின் பெர்க்‌ஷையர் ஹாத்வே (Berkshire Hathaway) நிறுவனத்தின் கீழ் கோக்க கோலா, ஆப்பிள், செவ்ரான், பேங்க் ஆஃப் அமெரிக்கா, அமெரிக்கன் எக்ஸ்பிரஸ் உள்ளிட்ட மிகப்பெரிய நிறுவனங்கள் இயங்கி வருகின்றன.

வாரன் பஃபெட் கடிதம்

ஒவ்வொரு ஆண்டும் பெர்க்‌ஷையர் ஹாத்வே நிறுவனத்தின் ஆண்டறிக்கைக்காக பலரும் காத்திருப்பதுண்டு. அந்த ஆண்டறிக்கையுடன் பங்குதாரர்களுக்கு வாரன் பஃபெட்டின் கடிதமும் வெளியாகும். அதில் வாரன் பஃபெட் தொழில், முதலீடு உள்ளிட்ட பல்வேறு விஷயங்கள் குறித்து தனது கருத்துகளை பகிர்ந்துகொள்வார்.

18 மடங்கு லாபம்

இந்நிலையில், கடந்த பிப்ரவரி 25ஆம் தேதி பெர்க்‌ஷையர் ஹாத்வே நிறுவனத்தின் ஆண்டறிக்கையும், வாரன் பஃபெட்டின் கடிதமும் வெளியாகியுள்ளது. அந்த கடிதத்தில், கோக்க கோலா மற்றும் அமெரிக்கன் எக்ஸ்பிரஸ் பங்குகளில் 2.6 பில்லியன் டாலரை 47 பில்லியன் டாலராக மாற்றியது குறித்து வாரன் பஃபெட் தனது அனுபவத்தை பகிர்ந்துள்ளார்.

இதுகுறித்து அவர் தனது கடிதத்தில், “1994 ஆகஸ்ட் மாதம் கோக்க கோலா நிறுவனத்தில் 400 மில்லியன் பங்குகளை ஏழு ஆண்டுகளாக வாங்கி முடித்தோம். இதற்கான மொத்த செலவு 1.3 பில்லியன் டாலர். 1994ஆம் ஆண்டில் கோக்க கோலாவிடம் இருந்து 75 மில்லியன் டாலர் டிவிடெண்டாக வந்தது.

2022ஆம் ஆண்டில் கோக்க கோலாவிடம் இருந்து வந்த டிவிடெண்ட் 704 மில்லியன் டாலராக அதிகரித்துள்ளது. பிறந்தநாளை போல ஒவ்வொரு ஆண்டுமே வளர்ச்சி நிச்சயமாக ஏற்பட்டுள்ளது. இனியும் டிவிடெண்ட் வருமானம் தொடர்ந்து அதிகரிக்கும் என எதிர்பார்க்கிறோம்

இதேபோல அமெரிக்கன் எக்ஸ்பிரஸ் நிறுவனத்திலும் நடந்தது. 1995ஆம் ஆண்டில் அமெரிக்கன் எக்ஸ்பிரஸ் நிறுவனத்தில் 1.3 பில்லியன் டாலருக்கு பங்குகளை வாங்கி முடித்தோம். இந்நிறுவனத்தில் கிடைத்த டிவிடெண்ட் 41 மில்லியன் டாலரில் இருந்து 302 மில்லியன் டாலராக உயர்ந்துள்ளது.

டிவிடெண்ட் வருமானம் ஒரு பக்கம் உயர்ந்தாலும் பங்கு விலை ஏற்றம் முக்கியமானது. 2022 இறுதியில் கோக்க கோலாவில் எங்கள் பங்குகளின் மதிப்பு 25 பில்லியன் டாலராகவும், அமெரிக்கன் எக்ஸ்பிரஸில் பங்குகளின் மதிப்பு 22 பில்லியன் டாலராகவும் உயர்ந்துள்ளது” என்று தெரிவித்துள்ளார்.