வங்கிக் கடன் வாங்கியோருக்கு குட் நியூஸ்.. ரிசர்வ் வங்கி உத்தரவால் பெரும் நிம்மதி!

ரிசர்வ் வங்கியின் கொள்கை கூட்டம் இரண்டு மாதங்களுக்கு ஒரு முறை கூடி ரெப்போ வட்டி விகிதம் உள்ளிட்ட கொள்கை முடிவுகள் எடுக்கப்படும். இவ்வகையில், ஏப்ரல் 3, 5, 6 தேதிகளில் ரிசர்வ் வங்கி ஆளுநர் சக்திகந்தா தாஸ் தலைமையில் நடைபெற்ற கொள்கை கூட்டம் இன்று முடிவடைந்தது.

கொள்கை கூட்டம் முடிந்ததை தொடர்ந்து ரிசர்வ் வங்கி ஆளுநர் சக்திகந்தா தாஸ் கொள்கை முடிவுகளை வெளியிட்டார். அப்போது ரெப்போ வட்டி விகிதத்தில் எந்த மாற்றமும் இல்லை எனவும், ரெப்போ வட்டி விகிதம் தொடர்ந்து 6.50% ஆக நீடிக்கும் எனவும் தெரிவித்தார்.

பணவீக்கத்தை கட்டுப்படுத்துவதற்காக 2022 மே மாதம் ரிசர்வ் வங்கி ரெப்போ வட்டி விகிதத்தை 4 சதவீதத்தில் இருந்து 4.40 சதவீதமாக உயர்த்தியது. அதன்பிறகு ஒவ்வொரு கொள்கை கூட்டத்திலும் ரெப்போ வட்டி விகிதத்தை தொடர்ந்து உயர்த்தியது ரிசர்வ் வங்கி. கடைசியாக கடந்த பிப்ரவரி மாதம் நடைபெற்ற கொள்கை கூட்டத்தில் ரெப்போ வட்டி 6.50% ஆக உயர்த்தப்பட்டது.

ரெப்போ வட்டி விகிதம் தொடர்ந்து உயர்த்தப்பட்டதால் வங்கிகளும் கடன்களுக்கான வட்டி விகிதத்தை உயர்த்திக்கொண்டே வந்தன. இதனால், ஏற்கெனவே கடன் வாங்கி கடனை செலுத்தி வருவோருக்கும், புதிதாக கடன் வாங்குவோருக்கும் மாத இஎம்ஐ கட்டணம் உயர்ந்து சுமை ஏற்பட்டது.

ஏற்கெனவே ரெப்போ வட்டி விகிதம் 6.50% ஆக இருப்பதால் கடன்களுக்கான வட்டி அதிகமாக இருக்கிறது. இந்நிலையில், ஏப்ரல் மாதமும் ரிசர்வ் வங்கி கொள்கை கூட்டத்தை உயர்த்தினால் இஎம்ஐ மேலும் அதிகரிக்கும் என கடன் வாங்கியோர் மத்தியில் அச்சம் இருந்தது. இந்நிலையில், ரிசர்வ் வங்கி ரெப்போ வட்டியை உயர்த்தாமல் விட்டுவிட்டதால் கடன் வாங்கியோருக்கு பெரும் நிவாரணமாக அமைந்துள்ளது.