வீட்டுக் கடன் 5 ஆண்டுகளில் இல்லாத அளவிற்கு குறையும் வாய்ப்பு

இந்திய ரிசர்வ் வங்கி குறைந்த கால கடனுக்கான வட்டி விகிதத்தை நேற்று 0.25சதவீதம் குறைத்து இருப்பதன் மூலம் கடந்த 5 ஆண்டுகளில் இல்லாத அளவிற்கு வீட்டுக் கடனுக்கான வட்டி தற்போது குறையும் வாய்ப்பு ஏற்பட்டுள்ளது.

நடப்பு நிதியாண்டுக்கான முதல் கூட்டம் நேற்று ரிசர்வ் வங்கி கவர்னர் ரகுராம் ராஜன் தலைமையில் நடந்தது. இந்தக் கூட்டத்தில் நடப்பு நிதியாண்டுக்கான நிதிக் கொள்கைகள் வெளியிடப்பட்டன.

ரிசர்வ் வங்கியிடமிருந்து குறுகிய கால அடிப்படையில் வங்கிகள் பெறும் கடனுக்கான வட்டி விகிதம் (ரெபோ ரேட்) 0.25 சதவீதம் குறைக்கப்பட்டது. இதையடுத்து, கடனுக்கான புதிய வட்டி விகிதம் 6.50 சதவீதமாக குறைந்தது.

பிற வங்கிகளிடமிருந்து ரிசர்வ் வங்கி பெறும் கடனுக்கான வட்டி விகிதம் (ரிவர்ஸ் ரெபோ ரேட்) தற்போதைய 5.75 சதவீதத்திலிருந்து 6 சதவீதமாக அதிகரிக்கப்படுகிறது. வங்கிகளின் ரொக்க கையிருப்பு விகிதம் (சி.ஆர்.ஆர்.) 4 சதவீதம் என்ற அளவிலேயே நீடிக்கும்.

முன்னதாக, கடந்த ஆண்டு செப்டம்பர் மாதம் வட்டி விகிதம் 0.50 சதவீதம் குறைக்கப்பட்டது. அதன் பிறகு, 6 மாதங்கள் கழித்து வட்டி விகிதம் தற்போது குறைக்கபட்டுள்ளது.

நேற்றைய இந்த அறிவிப்பை அடுத்து பங்குச் சந்தையில் சரிவு ஏற்பட்டது. திங்கள் கிழமை 25,400 ஆக முடிந்த சென்செக்ஸ் செவ்வாய்க் கிழமை 24,884 புள்ளிகளாக சரிந்தது. அதாவது 2.03 சதவீதம் சரிவு காணப்பட்டது.

பிற வர்த்தக வங்கிகள் கடனுக்கான வட்டி விகிதங்களை ஏற்கெனவே 0.25 சதவீதம் மற்றும் 0.50 சதவீதம் என்ற அளவில் குறைத்துள்ளன. மேலும் பல வங்கிகள் வீட்டுக் கடனுக்கான வட்டி விகிதங்களை குறைக்கலாம்.

2015-2016ஆம் ஆண்டின் பின் அரை இறுதியாண்டில் பண வீக்கம் அதிகளவில் குறைந்து இருப்பதும், அமெரிக்காவின் வட்டி விகிதம் உயர்த்தப்படமாட்டாது என்ற அறிவிப்பும் இந்த வட்டி குறைப்புக்கு காரணங்களாக அமைந்துள்ளன.