குறைந்த செலவில் கார் வாங்கணுமா? உங்களுக்கு சூப்பர் நியூஸ்!

மக்கள் எளிமையாக கார் வாங்க வழிவகை செய்யும் நோக்கில், இந்தியாவின் மிகப்பெரிய கார் உற்பத்தி நிறுவனமான மாருதி சுஸுகி புதிய சந்தா திட்டத்தை அறிமுகப்படுத்தியுள்ளது. இத்திட்டத்திற்காக மைல்ஸ் ஆட்டோமேட்டிவ் டெக்னாலஜீஸ் நிறுவனத்துடன் மாருதி சுஸுகி கூட்டணி அமைத்துள்ளது. இத்திட்டம் முதற்கட்டமாக ஹைதராபாத், புனே ஆகிய நகரங்களில் அறிமுகப்படுத்தப்பட்டுள்ளது. அடுத்தகட்டமாக நாடு முழுவதும் அறிமுகமாகும் என எதிர்பார்க்கப்படுகிறது.

மாருதி சுஸுகியின் சந்தா திட்டம் மூலம் வாடிக்கையாளர்கள் ஈசியாக மாதச் சந்தா செலுத்தி காரை பயன்படுத்தலாம். தற்போது மாருதியின் ஸ்விஃப்ட், டிசயர், விட்டாரா பிரெஜா, எர்டிகா, பலேனோ, சியஸ், எக்ஸ்எல்6 ஆகிய கார்களை 12, 18, 24, 30, 36, 42, 48 மாதச் சந்தா திட்டங்களின் மூலம் பெற முடியும்.

இத்திட்டத்தில் டவுன் பேமண்ட் செலுத்த தேவையில்லை. ஊருக்கு ஏற்ப வாகனங்களின் விலை மாறுபடுகிறது. உதாரணமாக, மாருதி ஸ்விஃப்ட் Lxi வாகனம் புனேவில் ரூ.17,600 மாதச் சந்தாவுக்கு வழங்கப்படுகிறது. இதே வாகனம் ஹைதராபாத்தில் ரூ.18,350 மாதச் சந்தாவுக்கு வழங்கப்படுகிறது. சந்தா கட்டணத்தில் சிறு வேறுபாடுகள் மட்டுமே இருக்கின்றன. சந்தாக் காலம் முடிந்தபின் காரை வாங்குவதற்கான பய்பேக் ஆப்ஷனும் இருக்கிறது.

இத்திட்டத்தில் டவுன் பேமண்ட் கிடையாது. கார் பராமரிப்பு உதவிகள் முழுமையாக வழங்கப்படுகிறது. காப்பீடு வசதி, 24 மணிநேர சாலை உதவி, ரீசேல் ரிஸ்க் கிடையாது போன்றவை இத்திட்டத்தின் சிறப்பம்சங்களாகும். வாகன பராமரிப்பு, இன்சூரன்ஸ், சாலை உதவி போன்றவற்றை மைல்ஸ் நிறுவனம் கவனித்துக்கொள்ளும்.

இதுகுறித்து மாருதி சுஸுகி நிறுவனத்தின் மார்கெட்டிங் & சேல்ஸ் துறையின் தலைமை இயக்குநர் சாஷங் ஸ்ரீவஸ்தவா பேசுகையில், “மக்கள் பொது போக்குவரத்தில் இருந்து தனிநபர் வாகனங்களுக்கு மாறி வருகின்றனர். எனினும், நீண்டகால அடிப்படையில் நிதிச் சுமை ஏற்படாதவகையில், பாக்கெட்டுக்கு பிரச்சினை நேராதவகையில் கார் வாங்க வேண்டுமென விரும்புகின்றனர்.

இதற்காகவே புதிய சந்தா திட்டத்தை அறிமுகப்படுத்தியிருக்கிறோம். இதனால் மாருதிக்கு நிறைய வாடிக்கையாளர்கள் கிடைப்பார்கள் என நம்புகிறோம்” என்று தெரிவித்துள்ளார்.