கார் விற்பனையில் கலக்கிய மாருதி சுஸுகி!

மார்ச் மாதம் தொடங்கியுள்ள நிலையில் சென்ற மாதத்துக்கான வாகன விற்பனை குறித்த விவரங்களை ஆட்டோமொபைல் நிறுவனங்கள் ஒவ்வொன்றாக வெளியிட்டு வருகின்றன. அதன்படி, இந்தியாவின் மிகப் பெரிய கார் தயாரிப்பு நிறுவனமான மாருதி சுஸுகி தனது விற்பனை விவரங்களை வெளியிட்டுள்ளது. சென்ற பிப்ரவரி மாதத்தில் இந்நிறுவனத்தின் கார் விற்பனை 10 சதவீதம் வளர்ச்சி கண்டுள்ளது.

உள்நாட்டு விற்பனை மற்றும் ஏற்றுமதி ஆகிய இரண்டையும் சேர்த்து மாருதி சுஸுகி நிறுவனம் மொத்தம் 1,72,321 கார்களை விற்பனை செய்துள்ளது. இது 2022ஆம் ஆண்டின் பிப்ரவரி மாத விற்பனையை விட 5 சதவீதம் அதிகமாகும். அப்போது மொத்தம் 1.64 லட்சம் கார்கள் மட்டுமே விற்பனை செய்யப்பட்டிருந்தன. உள்நாட்டு விற்பனையை மட்டும் எடுத்துக் கொண்டால் 10 சதவீத வளர்ச்சியுடன் மொத்தம் 1,47,467 கார்கள் இந்தியாவில் விற்பனை செய்யப்பட்டுள்ளன.

ஏற்றுமதியைப் பொறுத்தவரையில், மாருதி சுஸுகி நிறுவனம் பிப்ரவரி மாதத்தில் 28.4 சதவீத வீழ்ச்சியைப் பதிவுசெய்துள்ளது. மொத்தம் 17,207 கார்கள் ஏற்றுமதி செய்யப்பட்டுள்ளன. இந்திய ஆட்டோமொபைல் துறையில் எலெக்ட்ரானிக் சிப் தட்டுப்பாடு போன்ற பல பிரச்சினைகள் இருந்தாலும் அதையெல்லாம் சமாளித்து மாருதி சுஸுகி நிறுவனம் சந்தையில் ஆதிக்கம் செலுத்துகிறது.

பிரிவு வாரியாகப் பார்த்தால், மினி மற்றும் காம்பாக்ட் பிரிவில் மொத்தம் 1.01 லட்சம் வாகனங்கள் விற்பனை செய்யப்பட்டுள்ளன. அதேபோல, ஏப்ரல் முதல் பிப்ரவரி வரையிலான காலத்தில் மொத்தம் 10.12 லட்சம் கார்களை மாருதி சுஸுகி விற்பனை செய்திருக்கிறது.

அண்மைச் செய்திகளை உடனுக்குடன் படிக்க கூகுள் நியூஸில் தமிழ் சமயம் இணையதளத்தை பின் தொடரவும்!

விற்பனையைப் பொறுத்தவரையில், ஆல்டோ, எஸ்-பிரஸ்ஸோ ஆகிய கார்கள் அடங்கிய மினி கார்கள் பிரிவில் மொத்தம் 21,875 கார்கள் பிப்ரவரி மாதத்தில் விற்பனை செய்யப்பட்டுள்ளன. அதேபோல, பலேனோ, செலரியோ, வேகன் ஆர், டிசையர், இக்னிஸ், டூர் எஸ் ஆகிய கார்கள் அடங்கிய காம்பாக்ட் பிரிவில் 79,896 கார்களும், மிட் சைஸ் பிரிவில் 792 கார்களும் விற்பனை செய்யப்பட்டுள்ளன.

மொத்தமாக, பயணிகள் வாகனங்கள் பிரிவில் 1,02,565 கார்கள் விற்பனை செய்யப்பட்டுள்ள நிலையில், பயன்பாட்டு வாகனங்கள் பிரிவில் 33,550 வாகனங்களும், வேன் பிரிவில் 11,352 வாகனங்களும் விற்பனை செய்யப்பட்டுள்ளன.