அதிகரிக்கும் திருமணங்கள்... லாபம் ஈட்டும் மேட்ரிமோனி!

கொரோனா ஊரடங்கால் பொதுமக்கள் கூடுவது கட்டுப்படுத்தப்பட்டு சமூக இடைவெளி விதிமுறைகள் கடுமையாக்கப்பட்டுள்ளன. இதனால் ஊரடங்கு காலத்தில் பல திருமணங்கள் மிகவும் எளிமையாக நடைபெற்றன. வீட்டிலேயே மணமக்கள் மற்றும் குடும்ப உறுப்பினர்கள் மட்டும் கலந்துகொண்டு, எவ்விதமான ஆர்ப்பாட்டமும் இல்லாமல் எளிமையான முறையில் திருமணங்கள் நடைபெற்றன. இவ்வாறு வீட்டிலேயே எளிமையாகத் திருமணம் நடைபெறுவதால் திருமண நிகழ்ச்சிகளைச் சார்ந்துள்ள பல்வேறு வர்த்தகங்கள் பாதிக்கப்பட்டன.

இருப்பினும் இக்காலத்தில் மேட்ரிமோனி நிறுவனங்கள் நல்ல லாபம் ஈட்டியுள்ளன. மேட்ரிமோனி.காம் உள்ளிட்ட ஆன்லைன் வரன் தேடுதல் தளங்கள் முன்னெப்போதும் இல்லாத அளவுக்கு அதிகளவிலான வர்த்தகம் நடத்தியுள்ளன. ஏப்ரல் - ஜூன் காலாண்டில் 38 சதவீதம் கூடுதல் லாபம் ஈட்டியுள்ளதாக மேட்ரிமோனி.காம் நிறுவனம் தெரிவித்துள்ளது. இக்காலாண்டில் மேட்ரிமோனி.காம் நிகர லாபம் ரூ.9.32 கோடியிலிருந்து ரூ.9.36 கோடியாக அதிகரித்துள்ளது. இதற்கு முன்னர் ஜனவரி - மார்ச் காலாண்டில் நிகர லாபம் ரூ.59.53 கோடியாக மட்டுமே இருந்தது.

கொரோனா சமயத்தில் இந்தியர்கள் எதில் செலவிடுகிறார்கள்?

நிறுவனத்தின் மொத்த வருவாயைப் பொறுத்தவரையில், ஏப்ரல் - ஜூன் காலாண்டில் ரூ.91.86 கோடியாகச் சரிந்தது. முன்னதாக ஜனவரி - மார்ச் காலாண்டில் நிறுவனத்தின் மொத்த வருமானம் ரூ.389.69 கோடியாக இருந்தது. இதுகுறித்து மேட்ரிமோனி.காம் நிறுவனத்தின் தலைவரும், நிர்வாக இயக்குநருமான முருகவேல் ஜானகிராமன் கூறுகையில், “கொரோனாவால் ஏற்பட்ட தாக்கத்தை எங்களால் குறைக்க முடிந்தது. ஜூன் மாதத்தில் நாங்கள் வளர்ச்சிப் பாதைக்குத் திரும்பியுள்ளோம். செலவுகளைக் குறைப்பதற்கான பல்வேறு நடவடிக்கைகளால் நாங்கள் நல்ல லாபத்தை ஈட்டியுள்ளோம். இதில் நாங்கள் தொடர்ந்து கவனம் செலுத்துவோம். இது எங்களது சந்தை மதிப்பையும் வளர்ச்சி வேகத்தையும் மேலும் மேம்படுத்தும்” என்று நம்பிக்கை தெரிவித்துள்ளார்.