பால் உற்பத்தியில் கலக்கும் இந்தியா!

இந்தியாவின் பால் உற்பத்தி குறித்த விவரங்களை மத்திய கால்நடை வளர்ப்பு மற்றும் பால் வளத் துறை வெளியிட்டுள்ளது. அதன்படி, 2014-15ஆம் ஆண்டில் 146.3 மில்லியன் டன்னாக இருந்த இந்தியாவின் பால் உற்பத்தி அளவு 2018-19ஆம் ஆண்டில் 187.7 மில்லியன் டன்னாக உயர்ந்துள்ளது. இது 6.4 சதவீத வளர்ச்சியாகும். இந்தியாவில் உற்பத்தி செய்யப்படும் பாலில் 46 சதவீதம் அளவு கிராமங்களிலேயே குடும்பப் பயன்பாட்டுக்கும், எஞ்சிய 54 சதவீதம் அளவு பால் சந்தையில் விற்பனைக்காகவும் செல்வதாகக் கூறப்பட்டுள்ளது.

உற்பத்தி செய்யப்படும் பாலில் 36 சதவீதம் அளவு மட்டுமே அமைப்பு சார்ந்த துறைகளால் கையாளப்படுகின்றன. எஞ்சிய 64 சதவீத அளவும் முறையாகக் கையாளப்பட வேண்டும் என்று மத்திய அரசு கேட்டுக்கொண்டுள்ளது. கடந்த இரண்டு ஆண்டுகளில் கூட்டுறவுத் துறையில் பால் கொள்முதல் அளவு 9 சதவீதம் வளர்ச்சி கண்டுள்ளது. பால் உற்பத்திச் செலவுகளைக் குறைத்து உற்பத்தி அளவை அதிகரிக்க கால்நடை வளர்ப்புத் துறை தொடர்ந்து தேவையான நடவடிக்கைகளை மேற்கொண்டு வருவதாக மத்திய அரசு தெரிவித்துள்ளது.

தங்கம் விலை: நகை வாங்க இன்னைக்கு வேண்டாம்... நாளைக்கு போங்க!

பால் உற்பத்தி ஒருபுறம் அதிகரிக்கப்பட்டு வந்தாலும், மறுபுறம் பாலின் தரத்தில் குறைபாடு இருப்பதும் பிரச்சினையாக இருக்கிறது. எனவே பால் உற்பத்தி ஆலைகளிலும், கிராமங்களில் தரநிலைச் சோதனை வசதிகள் அரசு தரப்பில் ஏற்படுத்தப்பட்டு வருகின்றன. கூட்டுறவுப் பண்ணைகள் மற்றும் தனியார் பால் உற்பத்தி ஆலைகளில் பாலுக்கான தரநிலை மேம்பாட்டுத் திட்டம் அரசு தரப்பிலிருந்து செயல்படுத்தப்பட்டு வருகிறது. இதில் நிதி சார்ந்த உதவிகளும் வழங்கப்படுகின்றன.

பெட்ரோல் விலை: சென்னையில் இன்னைக்கு என்ன ரேட் தெரியுமா?

பாலின் தரத்தையும் உற்பத்தி அளவையும் உயர்த்தினால்தான் உள்நாட்டில் மட்டுமல்லாமல் சர்வதேச அளவிலும் சந்தை வாய்ப்பைப் பெருக்கவும், இந்தியாவின் போட்டித்தன்மையை அதிகரிக்கவும் முடியும் என்று மத்திய அரசு தெரிவித்துள்ளது. இதன் மூலம் பால் வளத் துறையில் முதலீடுகளை அதிகமாக ஈர்த்து, இத்துறையில் வேலைவாய்ப்புகளை அதிகரிக்க முடியும் என்றும் கூறப்பட்டுள்ளது.