தங்க நகைகளுக்கு ஹால்மார்க்... குவியும் நகைகள்!

கடைகளில் விற்பனை செய்யப்படும் தங்க நகைகளுக்கான தரத்தை உறுதிப்படுத்த இந்திய தர நிர்ணயக் கழகத்தின் (BIS) ஹால்மார்க் முத்திரை உதவுகிறது. இந்த முத்திரையைக் கொண்டு வாடிக்கையாளர்கள் தங்கத்தின் தரத்தை உறுதிசெய்யலாம். இந்த ஹால்மார்க் முத்திரையை ஜூன் மாதம் முதல் மத்திய அரசு கட்டாயமாக்கியது. அதன் பின்னர் நிறைய விற்பனையாளர்கள் ஹால்மார்க்கிங் செய்துள்ளதாகவும் இந்தத் திட்டம் வெற்றியடைந்துள்ளதாகவும் அரசு தரப்பில் தெரிவிக்கப்பட்டுள்ளது.

இதுகுறித்து இந்திய தர நிர்ணயக் கழகத்தின் தலைமை இயக்குநர் கூறுகையில், “குறுகிய காலத்திலேயே ஒரு கோடிக்கும் அதிகமான நகைகளுக்கு ஹால்மார்க் முத்திரை வழங்கப்பட்டுள்ளது. இதன் மூலம் இத்திட்டம் மிகப்பெரிய வெற்றியை அடைந்திருப்பதைப் பார்க்க முடிகிறது. 90,000க்கும் மேற்பட்ட நகை விற்பனையாளர்கள் தற்போது பதிவு செய்துள்ளனர். பதிவு செய்யப்பட்ட நகை விற்பனையாளர்களின் எண்ணிக்கை 91,603 ஆக உள்ளது” என்றார்.

எல்லாருக்கும் பென்சன்.. சீனியர் சிட்டிசன்களுக்கு எக்ஸ்ட்ரா சலுகைகள்!
ஹால்மார்க் முத்திரை பெறுவதற்காக ஜூலை 1 முதல் ஆகஸ்ட் 20ஆம் தேதி வரையில் 1.17 கோடி நகைகள் பெறப்பட்டுள்ளன. ஹால்மார்க் முத்திரை பெறுவதற்காக நகைகளை அனுப்பிய விற்பனையாளர்களின் எண்ணிக்கை ஜூலை 1 முதல் 15ஆம் தேதி வரை 5,145 ஆக இருந்தது. ஆனால் ஆகஸ்ட் 1 முதல் 15ஆம் தேதி வரையிலான காலத்தில் இந்த எண்ணிக்கை 14,349 ஆக உயர்ந்துள்ளது குறிப்பிடத்தக்கது.