Disney Layoffs: 7000 ஊழியர்களை வீட்டுக்கு அனுப்பும் டிஸ்னி.. திடீர் ஆட்குறைப்பு!

அமெரிக்காவின் மிகப்பெரிய நிறுவனங்களில் ஒன்றான டிஸ்னி (Disney) நிறுவனம் சுமார் 7000 ஊழியர்களை ஆட்குறைப்பு செய்வதாக அதிகாரப்பூர்வமாக தெரிவித்துள்ளது.

உலகம் முழுவதும் ஆட்குறைப்பு சுனாமி வீசி வருகிறது. குறிப்பாக அமெரிக்காவில் மிகப்பெரிய நிறுவனங்களும் கூட பல்லாயிரக்கணக்கான ஊழியர்களை ஆட்குறைப்பு செய்து வருகின்றன. 2023ஆம் ஆண்டில் உலக பொருளாதார மந்தநிலை வரும் என்ற அச்சத்தாலும், செலவுகளை குறைப்பதற்கும் ஊழியர்கள் ஆட்குறைப்பு செய்யப்படுகின்றனர்.

ஏற்கெனவே கூகுள், மைக்ரோசாஃப்ட், அமேசான், ஃபேஸ்புக், ட்விட்டர், நெட்ஃபிக்ஸ், ஐபிஎம் என பல்வேறு மிகப்பெரிய தொழில்நுட்ப நிறுவனங்கள் பல்லாயிரக்கணக்கான ஊழியர்களை ஆட்குறைப்பு செய்துவிட்டன. இந்த வரிசையில் இன்னும் பல நிறுவனங்கள் அங்குமிங்குமாக ஆட்குறைப்பு செய்கின்றன.

TCS: 700 மில்லியன் டாலர்.. பக்காவான டீலை கைப்பற்றிய டிசிஎஸ்!
இந்நிலையில், அமெரிக்காவின் மிகப்பெரிய நிறுவனங்களில் ஒன்றான டிஸ்னி 7000 ஊழியர்களை ஆட்குறைப்பு செய்ய முடிவு செய்துள்ளது. டிஸ்னி நிறுவனம் சுமார் 5.5 பில்லியன் டாலர் செலவுகளை குறைக்க திட்டமிட்டுள்ளதால் ஊழியர்களை ஆட்குறைப்பு செய்ய முடிவு செய்துள்ளது.

இதனால், உலகளவில் டிஸ்னி நிறுவனத்தில் பணிபுரியும் ஊழியர்களில் 3.6% பேர் பணிநீக்கம் செய்யப்படுகின்றனர். ஆட்குறைப்பு நடவடிக்கை பற்றிய தகவல் வெளியானதும் நேற்று டிஸ்னி நிறுவனத்தின் பங்கு விலை 4% மேல் உயர்ந்தது.

இதுமட்டுமல்லாமல், டிஸ்னி பங்குதாரர்களுக்கு மீண்டும் டிவிடெண்ட் செலுத்தப்படும் எனவும் டிஸ்னி உறுதியளித்துள்ளது. டிஸ்னி நிறுவனம் தனது ஸ்ட்ரீமிங் தொழிலில் அதிகம் செலவிட்டு வருவதாக சில முதலீட்டாளர்கள் விமர்சித்த நிலையில், ஊழியர்களை ஆட்குறைப்பு செய்வது மட்டுமல்லாமல் பல்வேறு பிரிவுகளில் மறு சீரமைப்பு செய்யப்போவதாகவும் டிஸ்னி தெரிவித்துள்ளது.

டிஸ்னி நிறுவனத்தின் போட்டியாளர்களான வார்னர் ப்ரோஸ், நெட்ஃபிக்ஸ் ஆகிய நிறுவனங்கள் ஏற்கெனவே ஆட்குறைப்பு நடவடிக்கைகளை செய்துவிட்டன. தற்போது 5.5 பில்லியன் டாலர் செலவுகளை குறைக்க டிஸ்னி திட்டமிட்டுள்ள நிலையில், விற்பனை மற்றும் பொது நிர்வாக செலவுகளில் 2.5 பில்லியன் டாலர் செலவுகளை குறைக்கவும், ஆட்குறைப்பு மற்றும் மற்ற நடவடிக்கைகள் வாயிலாக 3 பில்லியன் டாலர் சேமிக்கவும் டிஸ்னி முடிவு செய்துள்ளது.