தங்க நகைகளுக்கு இன்சூரன்ஸ்! நகை திருடுபோனால் கவலை இல்லை!

இந்தியாவின் மிகப் பெரிய தங்கக் கடன் வங்கியல்லா நிதி நிறுவனமான முத்தூட் ஃபைனான்ஸ், தங்க நகைகளுக்குக் காப்பீடு வழங்குவதற்காக பஜாஜ் ஆலியன்ஸ் ஜெனரல் இன்சூரன்ஸ் நிறுவனத்துடன் ஒப்பந்தம் செய்துள்ளது. முத்தூட் கோல்டு ஷீல்டு என்ற இந்தத் திட்டத்தின் படி, முத்தூட் ஃபைனான்ஸ் நிறுவனத்தின் வாடிக்கையாளர்களுக்கு நகைக் காப்பீடு கிடைக்கும். தங்க நகைக் கடன் பெற்றவர்களின் கடன் செலுத்தப்பட்ட பின்னர் அந்த நகைகளுக்கு காப்பீடு வழங்கப்படும்.

இந்தத் திட்டத்தின் படி நகை கொள்ளை போனாலோ அல்லது காப்பீடு செய்யப்பட்ட நபரின் வீட்டிலிருந்து திருடு போனாலோ, போக்குவரத்து சமயங்களில் காணாமல் போனாலோ, இயற்கை பேரழிவுகளில் இழந்துவிட்டாலோ காப்பீடு வழங்கப்படும். வெள்ளம் உள்ளிட்ட 13 பேரழிவுகளுக்கு இத்திட்டத்தின் கீழ் காப்பீடு கிடைக்கும். இந்தத் துறையில் மற்ற நிறுவனங்கள் நிர்ணயித்துள்ள பிரீமியத் தொகையை விட மிகக் குறைந்த பிரீமியத்தில் இந்தத் திட்டத்தை முத்தூட் ஃபைனான்ஸ் நிறுவனம் செயல்படுத்துகிறது.

ரூ.2,000 தரும் மோடி அரசு... பணம் எப்போ வருது தெரியுமா?

இந்தத் திட்டத்தின் இணைய எந்தவொரு ஆவணமும் தேவையில்லை. வெறும் 2 நிமிடங்களுக்குள் இத்திட்டத்தின் கீழ் பதிவு செய்யலாம். பொதுவாக, பொது காப்பீட்டு நிறுவனங்கள் வீட்டுக் காப்பீட்டின் ஒரு பகுதியாக தங்க நகைக் காப்பீட்டையும், வீட்டிலுள்ள மற்ற பொருட்களுக்கான காப்பீட்டையும் வழங்குகின்றன. தங்க நகைகளுக்கான காப்பீட்டுத் தொகை சில காப்பீட்டு நிறுவனங்களால் காப்பீடு செய்யப்பட்ட மொத்த வீட்டுக் காப்பீட்டுக் கொள்கையில் அதிகபட்சம் 15 சதவீதம் வரையில் கிடைக்கிறது. ஆனால் முத்தூட் ஃபைனான்ஸ் நிறுவனத்தின் இத்திட்டத்தில் அப்படி எந்தக் கட்டுப்பாடும் இல்லை.