வருமான வரி வசூல் 17% உயர்வு.. மத்திய அரசின் வருவாய் எவ்வளவு தெரியுமா?

நடப்பு 2023-24ஆம் நிதியாண்டு வரும் மார்ச் 31ஆம் தேதியுடன் முடிவடைய இருக்கிறது. இந்நிலையில், நடப்பு நிதியாண்டில் இதுவரை மட்டும் நிகர நேரடி வரி வசூல் (Net Direct tax collection) 17% அதிகரித்து 13.73 லட்சம் கோடி ரூபாயாக உயர்ந்துள்ளது என மத்திய நேரடி வரிகள் வாரியம் (Central Board of Direct Taxes) தெரிவித்துள்ளது.

மேலும் நடப்பு நிதியாண்டில் இதுவரை மொத்த நேரடி வரி வசூல் (Gross Direct tax collection) 22.58% அதிகரித்து 16.68 லட்சம் கோடி ரூபாயாக உயர்ந்துள்ளது எனவும் மத்திய நேரடி வரிகள் வாரியம் வெளியிட்டுள்ள தகவலில் தெரிவித்துள்ளது.

நேரடி வரி என்பதில் தனிநபர் வருமான வரி, கார்ப்பரேட் வரி ஆகிய இரண்டும் அடங்கும். இந்த முறை தனிநபர் வருமான வரி வசூல் உயர்ந்ததாலேயே நேரடி வரி வசூல் அளவு அதிகரித்துள்ளதாக தெரிகிறது.

2022 ஏப்ரல் 1ஆம் தேதி முதல் 2023 மார்ச் 10ஆம் தேதி வரை 2.95 லட்சம் கோடி ரூபாய் ரீஃபண்ட் தொகை செலுத்தப்பட்டுள்ளது. முந்தைய நிதியாண்டை காட்டிலும் ரீஃபண்ட் தொகை 59.44% அதிகரித்துள்ளது. ரீஃபண்ட் தொகை போக நிகர நேரடி வரி வசூல் 13.73 லட்சம் ரூபாயாக உள்ளது.

பட்ஜெட் மதிப்பீட்டில் 96.67% தொகையும், திருத்தப்பட்ட பட்ஜெட் மதிப்பீட்டில் 83.19% தொகையும் வசூலாகியுள்ளதாக மத்திய நேரடி வரிகள் வாரியம் வெளியிட்டுள்ள அறிக்கையில் தெரிவித்துள்ளது.

ரீஃபண்ட் தொகை போக மீதமுள்ள நிகர நேரடி வரி வருவாயில் கார்ப்பரேட் வருமான வரி வசூல் வளர்ச்சி 13.62% ஆகவும், தனிநபர் வருமான வரி மற்றும் செக்யூரிட்டிஸ் பரிவர்த்தனை வரி வசூல் வளர்ச்சி 20.06% ஆகவும் இருக்கிறது.

மொத்த நேரடி வரி வசூலில் கார்ப்பரேட் வருமான வரி வசூல் வளர்ச்சி 18.08% ஆகவும், தனிநபர் வருமான வரி மற்றும் செக்யூரிட்டிஸ் பரிவர்த்தனை வரி வசூல் வளர்ச்சி 27.57% ஆகவும் இருக்கிறது.