Netflix: 3 கோடி ரூபாய் சம்பளம் தரோம்.. வேலைக்கு ஆள் தேடும் நெட்ஃபிக்ஸ்!

உலகளவில் ஓடிடி துறையில் நெட்ஃபிக்ஸ் (Netflix) நிறுவனம் முன்னணியில் இருக்கிறது. அண்மையில் பல்வேறு நிறுவனங்கள் தங்கள் ஊழியர்களை ஆட்குறைப்பு செய்து வருகின்றன. இதில், நெட்ஃபிக்ஸ் நிறுவனமும் ஏற்கெனவே ஊழியர்களை ஆட்குறைப்பு செய்திருந்தது.

இந்நிலையில், சுமார் 3 கோடி ரூபாய் சம்பளத்துக்கு விமானப் பணியாளர் (Flight Attendant) வேலைக்கு அண்மையில் விளம்பரம் கொடுத்துள்ளது நெட்ஃபிக்ஸ் நிறுவனம். இந்த விளம்பரத்தின்படி கலிபோர்னியாவில் உள்ள நெட்ஃபிக்ஸ் தலைமை அலுவலகத்தின் தனியார் விமானத்துக்கு விமான பணியாளர் தேடி விளம்பரம் கொடுக்கப்பட்டுள்ளது.

இந்த பணியில் இணையும் நபருக்கு ஆண்டுக்கு 3 கோடி ரூபாய் சம்பளம் வழங்கப்படும் என அறிவிக்கப்பட்டுள்ளது. நடுத்தர ரக ஜெட் விமானத்தில் வேலை. ஸ்டாக்ரூமை பராமரிப்பது உள்ளிட்ட பொறுப்புகள் அவருக்கு வழங்கப்படும். இந்த வேலைக்கு 60,000 டாலர் முதல் 3,85,000 டாலர் வரை சம்பளம் வழங்க தயாராக இருப்பதாக நெட்ஃபிக்ஸ் தெரிவித்துள்ளது.

இந்திய ரூபாய் மதிப்பில் கணக்கிட்டால் சுமார் 48 லட்சம் ரூபாய் முதல் 3.12 கோடி ரூபாய் வரை சம்பளம் கிடைக்கும். கலிபோர்னியாவில் தலைமை அலுவலகம் இருக்கும் சூழலை, கலிபோர்னியாவை சேர்ந்த விமானப் பணியாளரை தேடுவதாக நெட்ஃபிக்ஸ் தனது விளம்பரத்தில் தெரிவித்துள்ளது.

தேர்ந்தெடுக்கப்படும் நபருக்கு தொழில்முறை பயிற்சி, பயணிகள் பாதுகாப்பு மற்றும் விமான எமெர்ஜென்சி வெளியேற்றம் போன்ற பயிற்சிகளும் வழங்கப்படும் என நெட்ஃபிக்ஸ் நிறுவனம் தெரிவித்துள்ளது. உள்நாட்டில் மட்டுமல்லாமல் வெளிநாடுகளுக்கும் பயணிக்க வேண்டிய தேவை இருக்கும் என நெட்ஃபிக்ஸ் தெரிவித்துள்ளது.

நெட்ஃபிக்ஸ் நிறுவனம் கடந்த ஆண்டு சுமார் 300 ஊழியர்களை ஆட்குறைப்பு செய்தது குறிப்பிடத்தக்கது. இதுமட்டுமல்லாமல், சப்ஸ்கிரைபர்கள் எண்ணிக்கை குறைவாலும் நெட்ஃபிக்ஸ் நிறுவனம் நஷ்டத்தை சந்தித்து வருகிறது.