Toll tax: நெடுஞ்சாலையில் டோல் கட்டணம் குறைப்பு.. புதிய ரேட் இதுதான்!

இந்தியாவில் நெடுஞ்சாலைகளில் டோல் கட்டணங்கள் வாகன ஓட்டிகளுக்கு பெரும் சுமையாக இருக்கின்றன. எனவே, டோல் கட்டணத்தை எல்லா இடங்களிலுமே குறைக்க வேண்டும் என்பது வாகன ஓட்டிகளின் ஒருமித்த கோரிக்கையாக உள்ளது.

இந்நிலையில், டெல்லி, ஹரியானா, பஞ்சாப் ஆகிய மாநிலங்களை சேர்ந்த வாகன ஓட்டிகளுக்கும், சுற்றுலா பயணிகளுக்கும் நிவரணம் அளிக்கும் வகையில், பானிபட் - ரோஹ்தக் நெடுஞ்சாலையில் தஹர் என்ற இடத்தில் அமைந்துள்ள சுங்கச் சாவடியில் டோல் கட்டணம் குறைக்கப்பட்டுள்ளது.

சுங்கக் கட்டணம் குறைப்பு:

இந்த சுங்கச் சாவடியில் டோல் கட்டணத்தை குறைத்து தேசிய நெடுஞ்சாலைத் துறை (NHAI) உத்தரவிட்டுள்ளது. குறைக்கப்பட்ட புதிய டோல் கட்டணங்கள் நேற்று (பிப்ரவரி 26) முதல் அமலுக்கு வந்துள்ளன. இதற்கு முன் 2022ஆம் ஆண்டு ஏப்ரல் 1ஆம் தேதி இந்த சுங்கச் சாவடியில் டோல் கட்டணம் உயர்த்தப்பட்டிருந்தது குறிப்பிடத்தக்கது.

அப்போதே இந்த சுங்கச் சாவடியில் டோல் கட்டணம் குறைக்கப்பட வேண்டும் என்று பொதுமக்களும், விவசாயிகளும், வாகன ஓட்டிகளும் எதிர்ப்பு தெரிவித்திருந்தனர். இந்நிலையில், தற்போது டோல் கட்டணத்தை தேசிய நெடுஞ்சாலை துறை குறைத்துள்ளது.

புதிய டோல் கட்டணம்:

இனி பானிபட் - ரோஹ்தக் நெடுஞ்சாலையில்பயணிக்கும் கார், ஜீப், வேன் போன்ற வாகனங்களுக்கு ஒன்வேக்கு (One way) 60 ரூபாயும், டூவேக்கு (Two way) 90 ரூபாயும் டோல் கட்டணம் வசூலிக்கப்படும். இதற்கு முன் 100 ரூபாயும், 155 ரூபாயும் கட்டணம் வசூலிக்கப்பட்டது குறிப்பிடத்தக்கது.

வர்த்தக வாகனங்களுக்கு:

மினிபஸ் உள்ளிட்ட இலகுரக வர்த்தக வாகனங்களுக்கு டோல் கட்டணம் ஒன்வேக்கு 100 ரூபாயாகவும், டூவேக்கு 150 ரூபாயாகவும் குறைக்கப்பட்டுள்ளது. இதற்கு முன் 160 ரூபாயும், 235 ரூபாயும் வசூலிக்கப்பட்டது.

லாரிகளுக்கு டோல் கட்டணம் ஒன்வேக்கு 205 ரூபாயாகவும், டூவேக்கு 310 ரூபாயாகவும் குறைக்கப்பட்டுள்ளது. இதற்கு முன் லாரிகளுக்கு 320 ரூபாயும், 480 ரூபாயும் கட்டணம் வசூலிக்கப்பட்டது.

மூன்று அச்சு (Three axle) லாரிகள் மற்றும் வர்த்தக வாகனங்களுக்கு டோல் கட்டணம் ஒன்வேக்கு 225 ரூபாயாகவும், டூவேக்கு 340 ரூபாயாகவும் குறைக்கப்பட்டுள்ளது.

ஜேசிபி (JCB) போன்ற வாகனங்களுக்கு டோல் கட்டணம் ஒன்வேக்கு 325 ரூபாயும், டூவேக்கு 490 ரூபாயும் வசூலிக்கப்படும்.