தமிழக அரசுடன் போராடிய நிசான்... ஒரு வழியா முடிவுக்கு வந்தது!

ஃபிரான்ஸ் நாட்டைச் சேர்ந்த ரினால்ட் நிறுவனமும், ஜப்பான் நாட்டைச் சேர்ந்த நிசான் நிறுவனமும் இணைந்து 2008ஆம் ஆண்டில் இந்தியாவில் வாகன உற்பத்தி ஆலையைத் தொடங்கின. சென்னையை அடுத்த ஒரகடம் பகுதியில் ரினால்ட் நிசான் ஆட்டோமோட்டிவ் இந்தியா பிரைவேட் லிமிடெட் என்ற பெயரில் 2010ஆம் ஆண்டில் இந்த உற்பத்தி ஆலை செயல்பாட்டுக்கு வந்தது. ஆண்டுக்கு 4.8 லட்சம் வாகனங்களை உற்பத்தி செய்யும் இந்த ஆலையானது சுமார் 40,000 பேருக்கு வேலைவாய்ப்புகளையும் வழங்கி வருகிறது.

இந்த ஆலையைத் தொடங்குவதற்கு தமிழக அரசு சார்பில் ஊக்கச் சலுகைகளும் வரிச் சலுகைகளும் அளிக்கப்படும் என்று தமிழக அரசு உறுதியளித்திருந்தது. ஆனால் உறுதியளித்தப்படி, நிசான் நிறுவனத்துக்கு சலுகை வழங்கவில்லை என்ற நிலையில், கடந்த 2016ஆம் ஆண்டில் தமிழக அரசின் மீது நிசான் நிறுவனம் வழக்குத் தொடர்ந்தது. 2008ஆம் ஆண்டில் தமிழக அரசுக்கும் நிசான் நிறுவனத்துக்கும் இடையே போடப்பட்ட ஒப்பந்தத்தின்படி, நிசான் நிறுவனத்துக்கு சலுகை எதுவும் வழங்கவில்லை என்று தமிழக அரசின் மீது குற்றஞ்சாட்டப்பட்டிருந்தது. நான்கு ஆண்டுகளாக நீடித்த இந்த வழக்கு தற்போது முடிவுக்கு வந்துள்ளது.

தங்கம் விலை: நகை வாங்கப் போறீங்களா... அப்போ கிளம்புங்க!

நிசான் நிறுவனத்துக்கு செட்டில்மெண்ட் தொகையை வழங்குவதாகத் தமிழக அரசு ஒப்புதல் அளித்துள்ளது. நிசான் நிறுவனமும் தனது வழக்கைத் திரும்பப் பெறுவதாகத் தெரிவித்துள்ளது. நிசான் நிறுவனத்துக்கு செட்டில்மெண்ட் தொகை வழங்கப்படும் என்று தமிழக தொழில் துறை அமைச்சரான எம்.சி.சம்பத் தெரிவித்துள்ளார். இதன்படி, நிசான் நிறுவனத்துக்கு 185 மில்லியன் டாலர் முதல் 238 மில்லியன் டாலர் வரையில் தமிழக அரசு வழங்கும் என்று கூறப்படுகிறது. இந்திய ரூபாய் மதிப்பில் ரூ.2,100 கோடி முதல் ரூ.2,600 கோடி வரையில் இருக்கும். செட்டில்மெண்ட் தொகை எவ்வளவு, அது எப்போது வழங்கப்படும் என்ற விவரங்களை இரு தரப்பும் இன்னும் வெளியிடவில்லை.

தமிழக அரசு இதுபோல உறுதியளித்தபடி ஊக்கச்சலுகைகளை வழங்குவதில்லை என்று கைரன் எனர்ஜி, வோடஃபோன், டியூட்சே டெலகாம் உள்ளிட்ட நிறுவனங்களும் வழக்கு தொடர்ந்தன என்பது குறிப்பிடத்தக்கது.