Jet Airways: முதல் வகுப்பு பயணிகளுக்கு இனி இலவச உணவு கிடையாது- ஜெட் ஏர்வேஸ் அதிரடி அறிவிப்பு

முதல் வகுப்பு பயணிகளுக்கு இனி இலவச உணவு வழங்கப்போவதில்லை என்று முன்னணி விமான சேவை வழங்கும் ஜெட் ஏர்வேஸ் நிறுவனம் அதிகாரப்பூர்வமாக அறிவித்துள்ளது.

சமீபத்தில் ஜெட் ஏர்வேஸ் நிறுவனம், உள்நாட்டு சேவை வழங்கும் விமானங்களின் எக்கானமி கிளாஸ் என்கிற முதல் வகுப்பை ’எக்கானமி லைட்’ மற்றும் ’எக்கானமி டீல்’ என இருவேறு பிரிவுகளாக பிரித்தது.

அதனடிப்படையில் (நாளை) முதல் வகுப்பு பயணிகளுக்கு இலவச உணவு வழங்கப்படாது என கூறப்பட்டுள்ளது. நாளை முதல் முன்பதிவு செய்யப்படும் டிக்கெட்டுகளுக்கு இந்த புதிய நடைமுறை அமல்படுத்தப்படுகிறது.

இதுகுறித்து ஜெட் ஏர்வேஸ் நிறுவனம் வெளியிட்டுள்ள தகவலில், தற்போதைய முதல் வகுப்பு பயண கட்டணங்களுக்கு இலவச உணவு அளிப்பது கட்டுபடியாகது எனவும், ஆனால் முதல் வகுப்பு பயணிகள் ஆன்-போர்டு மெனு மூலம் கூடுதல் பணம் செலுத்தி உணவு பெறலாம் என குறிப்பிடப்பட்டுள்ளது.

ஜெட் ஏர்வேஸ் உள்நாட்டு விமானங்களில், முதல் வகுப்பு பயணிகளுக்கு இலவச உணவு வழங்கப்படுவது நிறுத்தப்பட்டாலும் தேநீர், காபி உள்ளிட்ட பானங்கள் இலவசமாக வழங்கப்படுவது தொடரும் என விற்பனை மற்றும் சந்தைப்படுத்துதல் அதிகாரி ராஜ் சிவகுமார் தெரிவித்துள்ளார்.