இறங்கு வரிசையில் இந்தியப் பொருளாதாரம்!

இந்த ஆண்டின் முதல் காலாண்டில் (ஏப்ரல் - ஜூன்) இந்தியப் பொருளாதார வளர்ச்சி 5 சதவீதமாக மட்டுமே இருந்தது. இது பல்வேறு தரப்புகளில் அரசின் மீது விமர்சனத்தை ஏற்படுத்தியது. இந்தியப் பொருளாதார மதிப்பை 5 லட்சம் கோடி டாலர் அளவுக்கு உயர்த்த இலக்கு நிர்ணயிக்கப்பட்டுள்ள நிலையில் இந்த வளர்ச்சி வேகம் போதாதென்று ஆய்வு நிறுவனங்கள் பல எச்சரித்தன. இந்த துக்கத்திலிருந்து இந்திய அரசு மீள்வதற்குள் அடுத்த காலாண்டில் பொருளாதார வளர்ச்சி மேலும் குறைந்தது.

ஜூலை - செப்டம்பர் காலாண்டில் இந்தியப் பொருளாதார வளர்ச்சி இன்னும் மோசமாக 4.5 சதவீதமாகக் குறைந்தது. இத்தகவல் வெளியானவுடன் நாட்டில் பொருளாதார மந்தநிலை இருப்பதை மத்திய அரசு பகிரங்கமாக ஒப்புக்கொண்டது. வரும் காலாண்டுகளில் வளர்ச்சி மேம்படுத்துவதற்கான நடவடிக்கைகள் மேற்கொள்ளப்படும் எனவும் அரசு உறுதியளித்தது. இந்நிலையில் அரசுக்குக் கெட்ட செய்தியாக, அக்டோபர் - டிசம்பர் காலாண்டில் பொருளாதார வளர்ச்சி இன்னும் மோசமாக 4.3 சதவீதமாகக் குறையும் என்று ஜப்பானைச் சேர்ந்த ஆய்வு நிறுவனமான நோமுரா வெளியிட்டுள்ள ஆய்வறிக்கையில் தெரிவித்துள்ளது.

மின்சாரத் தட்டுப்பாடா... இல்லவே இல்லை!

தொடர்ந்து மூன்று காலாண்டுகளாக நாட்டின் பொருளாதார வளர்ச்சி பின்னோக்கிச் சென்றுகொண்டிருப்பதால் மத்திய அரசுக்குக் கடும் நெருக்கடி ஏற்பட்டுள்ளது. வங்கியல்லா நிதி நிறுவனங்கள் துறையில் நிலவும் நெருக்கடியாலும், நுகர்வு குறைந்து வருவதாலும் பொருளாதார வளர்ச்சி மந்தமாக இருப்பதாக நோமுரா நிறுவனம் கூறியுள்ளது. எனினும் அடுத்த ஜனவரி - மார்ச் காலாண்டில் வளர்ச்சி சற்று மேம்பட்டு 4.7 சதவீதமாக உயரும் என்று நோமுரா நம்பிக்கை தெரிவித்துள்ளது.

பொருளாதார மந்தநிலை: என்ன சொல்கிறார் பிரனாப் முகர்ஜீ?

2016ஆம் ஆண்டிலிருந்தே வேலையின்மை, முதலீடுகள் குறைவு போன்ற பிரச்சினைகளால் பொருளாதார வளர்ச்சி மந்தமாகத் தொடங்கியதாக நோமுரா நிறுவனத்தின் தலைமைப் பொருளாதார நிபுணரான சோனல் வர்மா கூறியுள்ளார். சமீபத்தில் ஆசிய மேம்பாட்டு வங்கி வெளியிட்டிருந்த அறிக்கையில், இந்தியாவின் பொருளாதார வளர்ச்சி நடப்பு நிதியாண்டில் 5.1 சதவீதமாக மட்டுமே இருக்கும் என்று தெரிவித்திருந்தது. உலக வங்கி, சர்வதேச நாணய நிதியம் உள்ளிட்ட அமைப்புகளும் பொருளாதார வளர்ச்சி 5 சதவீதத்தை விடக் குறைவாகவே இருக்கும் என்று எச்சரித்துள்ளன.