46,000 டூ 4.5 கோடி ரூபாய்... அதிர்ஷ்டம்னா இப்படி அடிக்கணும்!

50 ரூபாய் கிடைக்க வேண்டிய இடத்தில் 100 ரூபாய் கிடைத்தால் யாராவது சும்மா இருப்பார்களா? லாட்டரியில் பணம் விழுவதே பெரிய அதிசயம். அதில் கிடைக்க வேண்டிய பணம் பல மடங்கு பெருகி கிடைத்தால் ஹார்ட் அட்டாக் வந்தாலும் ஆச்சர்யமில்லை.

அமெரிக்காவில் நார்த் கரோலினா மாகாணத்தில் உள்ள பெம்ப்ரோக் பகுதியை சேர்ந்தவர் ஜோஷுவா லாக்லியர். இவர் அண்மையில் உள்ளூரில் உள்ள ஒரு கடையில் 10 டாலருக்கு லாட்டரி டிக்கெட் வாங்கியுள்ளார். பின்னர் அவருக்கு லாட்டரியில் பரிசும் வந்துள்ளது.

லாட்டரி சீட்டை ஸ்கேன் செய்துபார்த்தபோது அவருக்கு 600 டாலர் பரிசு கிடைத்துள்ளதாக தெரியவந்துள்ளது. 600 டாலர் என்பது இந்திய ரூபாயில் சுமார் 46000 ரூபாய். கிடைத்த பரிசை வாங்கிக்கொள்வோம் என லாட்டரி அலுவலகத்துக்கு சென்றுள்ளார் ஜோஷுவா.

வெளிநாட்டு நிறுவனத்தை வளைத்து போடும் அம்பானி.. அதுவும் மிகப்பெரிய ரேட்டுக்கு!
அங்கு அவருக்கு எதிர்பாராத சர்பிரைஸ் நேர்ந்துள்ளது. 600 டாலருக்கு பதிலாக அவர் 585,949 டாலர் பரிசு வென்றுள்ளதாக லாட்டரி அலுவலகத்தில் கூறி இருக்கின்றனர். இது கனவா நனவா என நம்ப முடியாமல் அதிர்ச்சியில் உறைந்துள்ளார் ஜோஷுவா.

585,949 டாலர் என்பது இந்திய மதிப்பில் சுமார் 4.5 கோடி ரூபாய். இதை வைத்து சொந்தமாக ஒரு வீடு, கார் வாங்குவதற்கு ஜோஷுவா முடிவு செய்துள்ளார். மேலும், சமூகத்துக்கு ஏதாவது செய்வதற்கும் பணத்தை ஒதுக்கியுள்ளார்.