அமேசான் திருந்தவே திருந்தாதா? மீண்டும் தேசியக் கொடி பிரின்ட் செய்த ஷூக்கள் விற்பனை!!

வெளியுறவுத்துறை அமைச்சர் சுஷ்மா ஸ்வராஜின் பகிரங்க எச்சரிக்கையைத் தொடர்ந்து தனது இணையதளத்தில் இருந்து தேசியக் கொடி அச்சிட்ட டோர்மேட்டை விற்பனையை அமேசான் இணையதளம் வாபஸ் பெற்றது. ஆனால், இன்னும் ஷூ கிடைப்பது அதிர்ச்சி அளிப்பதாக உள்ளது.

ஆனால், அமேசானின் அமெரிக்க இணையதளத்தில் தேசியக் கொடி பிரின்ட் செய்த ஷூ, ஷூ லேஸ் மற்றும் அதனுடன் இணைந்த இரும்பு வளையங்கள் என அனைத்திலும் தேசியக் கொடி சின்னமும், மூவர்ணம் இடம் பெற்றுள்ளது. மேலும், இந்திய தேசியக் கொடியில் இடம் பெற்றிருக்கும் அசோக சக்கரம் அச்சிடப்பட்ட நாய் உடையும் அமேசான் இணையதளத்தில் விற்பனைக்கு உள்ளது.

லாஸ் ஏஞ்சல்சைச் சேர்ந்த என்.ஒய்.எல்.ஏ. என்ற நிறுவனம் இந்த ஷூக்களை ''சுக்கா கேன்வாஸ் ஷூஸ்'' என்ற பெயரில், 43.99 டாலர் விலையில் விற்பனைக்கு வைத்துள்ளது. நாய்க்கான ஆடையில் விலை 19.99 டாலர் என்று குறிப்பிடப்பட்டுள்ளது.

முன்னதாக அமேசான் இணையதளத்தில் தேசியக் கொடி பிரின்ட் செய்யப்பட்ட டோர்மெட் விற்பனைக்கு வைக்கட்டு இருந்தது சர்ச்சையைக் கிளப்பியது. இதையடுத்து, ''மன்னிப்பு கேளுங்கள் அல்லது விசா ரத்து செய்யப்படும்'' என்று சுஷ்மா சுவராஜ் நேற்று பகிரங்க எச்சரிக்கை விடுத்து இருந்தார். இதற்கு பணிந்து டோர்மெட் விற்பனையை இணையதளத்தில் இருந்து அமேசான் நிறுவனம் வாபஸ் பெற்றது.

கடந்த 1971ஆம் ஆண்டு சட்டத்தின்படி, தேசியக் கொடிக்கு அவமானம் ஏற்படுத்துபவர்களுக்கு 3 ஆண்டுகள் சிறை தண்டனையும், அபராதமும் விதிக்கப்படும் அல்லது இவற்றில் ஒன்றும் மட்டும் விதிக்கப்படும்.