யுபிஐ பரிவர்த்தனைகளுக்கு கட்டணம் வசூலிக்கப்படாது.. NPCI அதிகாரப்பூர்வ அறிவிப்பு!

NPCI : யுபிஐ (UPI) பரிவர்த்தனைகளுக்காக வாடிக்கையாளர்களிடம் கட்டணம் வசூலிக்கப்படாது என தேசிய பணப்பரிவர்த்தனை கழகம் (NPCI) விளக்கம் அளித்துள்ளது.

இந்தியாவில் டிஜிட்டல் பரிவர்த்தனைகளின் பயன்பாடு ஒவ்வொரு ஆண்டும் அதிகரித்து வருகிறது. டிஜிட்டல் பரிவர்த்தனைகளில் யுபிஐ கட்டணங்களே ஆதிக்கம் செலுத்தி வருகின்றன.

இந்த சூழலில், 2000 ரூபாய்க்கு மேற்பட்ட யுபிஐ வாலட் பரிவர்த்தனைகளுக்கு 1.1% கட்டணம் (interchange fee) வசூலிக்கப்படும் என தேசிய பணப்பரிவர்த்தனை கழகம் தெரிவித்துள்ளது. இதனால், யுபிஐ பரிவர்த்தனைகளுக்கு கட்டணம் வசூலிக்கப்படுமோ என பொதுமக்கள் மத்தியில் குழப்பம் ஏற்பட்டது.

இந்நிலையில், இதற்கு தேசிய பணப்பரிவர்த்தனை கழகம் விளக்கம் அளித்துள்ளது. இதுகுறித்து தேசிய பணப்பரிவர்த்தனை கழகம் வெளியிட்டுள்ள அறிக்கையில் தலைப்பிலேயே ‘யுபிஐ இலவசமானது, வேகமானது, பாதுகாப்பானது, எளிதானது’ என்று தெரிவித்துள்ளது.

மேலும், பெரும்பாலும் வங்கி கணக்கில் இணைக்கப்பட்ட யுபிஐ பரிவர்த்தனைகளே பயன்படுத்தப்படுகின்றன. மொத்த யுபிஐ பரிவர்த்தனைகளில் 99.9% பரிவர்த்தனைகள் வங்கிக் கணக்குடன் இணைக்கப்பட்டவையே. இந்த பரிவர்த்தனைகளுக்கு தொடர்ந்து வாடிக்கையாளர்களுக்கு, வியாபாரிகளுக்கும் எந்த கட்டணமும் வசூலிக்கப்படாது என தேசிய பணப்பரிவர்த்தனை கழகம் தெரிவித்துள்ளது.

தற்போது புதிதாக மொபைல் வாலட் பரிவர்த்தனைகளுக்கு மட்டுமே 1.1% கட்டணம் அறிமுகப்படுத்தப்பட்டுள்ளது. இந்தக் கட்டணங்களும் வியாபாரிகளிடம் வசூலிக்கப்படுமே தவிர, வாடிக்கையாளர்களிடம் வசூலிக்கப்படாது என தேசிய பணப்பரிவர்த்தனை கழகம் தெளிவுபடுத்தியுள்ளது.

இதுமட்டுமல்லாமல், வழக்கம் போல வங்கி கணக்கு வழியாக மேற்கொள்ளப்படும் சாதாரண யுபிஐ பரிவர்த்தனைகளுக்கு எந்தவொரு கட்டணமும் வசூலிக்கப்படாது என தேசிய பணப்பரிவர்த்தனை கழகம் தெரிவித்துள்ளது.

இதையும் தாண்டி, எல்லா யுபிஐ ஆப்களிலும் வாடிக்கையாளர்கள் வங்கிக் கணக்கு, கிரெடிட் கார்டு, வாலட் என விருப்பம் போல பரிவர்த்தனை முறையை தேர்வு செய்து பணம் அனுப்ப முடியும் எனவும் தேசிய பரிவர்த்தனை கழகம் தெரிவித்துள்ளது.

பேடிஎம் (Paytm) நிறுவனமும் இதேபோல விளக்கம் அளித்துள்ளது. யுபிஐ பரிவர்த்தனைகளுக்கு வங்கிக் கணக்கு வாயிலாகவோ, வாலட் வாயிலாகவோ பணம் செலுத்தும்போது எந்தவொரு வாடிக்கையாளரும் கட்டணம் செலுத்த தேவை இல்லை என பேடிஎம் நிறுவனம் தெரிவித்துள்ளது.