வெற்றிநடை போடும் இன்ஃபோசிஸ்: கோடிக் கணக்கில் லாபம்!

இந்தியாவின் மிகப் பெரிய தகவல் தொழில் நுட்பச் சேவை நிறுவனங்களில் ஒன்றான இன்ஃபோசிஸ், பெங்களூருவைத் தலைமையிடமாகக் கொண்டு இந்தியா மட்டுமல்லாமல் அமெரிக்கா உள்ளிட்ட சர்வதேச நாடுகளிலும் சேவை வழங்கி வருகிறது. கடந்த சில ஆண்டுகளில் ஐடி துறையில் மந்தநிலை நீடித்ததால் இன்ஃபோசிஸ் நிறுவனத்தால் போதிய அளவில் லாபமீட்ட முடியவில்லை. ஊழியர்கள் பலர் பணிநீக்கமும் செய்யப்பட்டனர். இந்நிலையில், சென்ற ஆண்டின் அக்டோபர் - டிசம்பர் காலாண்டில் இன்ஃபோசிஸ் நிறுவனத்தின் நிகர லாபம் 23.7 சதவீதம் வளர்ச்சி கண்டுள்ளதாகப் பங்குச் சந்தையில் அந்நிறுவனம் சமர்ப்பித்துள்ள அறிக்கையில் தெரிவிக்கப்பட்டுள்ளது.

2018ஆம் ஆண்டின் அக்டோபர் - டிசம்பர் காலாண்டில் இந்நிறுவனம் ரூ.3,610 கோடி மட்டுமே லாபம் ஈட்டியிருந்த நிலையில், 2019 அக்டோபர் - டிசம்பரில் அதன் லாபம் ரூ.4,466 கோடியாக அதிகரித்துள்ளது. நிறுவனத்தின் மொத்த வருவாயைப் பொறுத்தவரையில், 7.9 சதவீத வளர்ச்சியுடன் ரூ.23,092 கோடி 2019 அக்டோபர் - டிசம்பரில் கிடைத்துள்ளது. 2018 அக்டோபர் - டிசம்பரில் கிடைத்த வருவாய் ரூ.21,400 கோடி மட்டுமே. இந்த முழு நிதியாண்டில் இன்ஃபோசிஸ் நிறுவனத்தின் வருவாய் 10.5 சதவீதம் வரையில் உயரும் என்று மதிப்பிடப்பட்டுள்ளது.

ஈரான் பிரச்சினை சரியானால் இந்திய விமானங்கள் பறக்கும்!

இன்ஃபோசிஸ் நிறுவனத்தில் 2019 டிசம்பர் நிலவரப்படி மொத்தம் 2,43,454 பேர் பணியாற்றுகின்றனர். அதில் 6,968 பேர் புதிதாகச் சேர்க்கப்பட்டவர்கள். இந்திய ஐடி துறையின் மந்தநிலை சீராகி இயல்பு நிலை திரும்பியுள்ள நிலையில், பணிநீக்கம் குறைந்து புதிய வேலைவாய்ப்புகள் அதிகரித்துள்ளன. சமீபத்தில் இன்ஃபோசிஸ் நிறுவனம் தனது வருவாய் விவரங்களை உயர்த்திக் காட்டியதாக சர்ச்சைக் குற்றச்சாட்டு ஒன்று வெளியாகி பரபரப்பை ஏற்படுத்தியது. அதை மறுத்துள்ள இன்ஃபோசிஸ் நிறுவனம் அதற்கு எந்தவொரு ஆதாரமும் இல்லை என்று திட்டவட்டமாகத் தெரிவித்துள்ளது.

நெருங்கும் பொங்கல்: பூக்கள் விலை உயர்வு!

இன்ஃபோசிஸ் நிறுவனத்தின் லாபத்தைப் பொறுத்தவரையில், டாலர் மதிப்பீட்டில் அக்டோபர் - டிசம்பர் காலாண்டில் 627 மில்லியன் டாலர் லாபம் கிடைத்துள்ளது. இது 2018ஆம் ஆண்டின் அக்டோபர் - டிசம்பர் மாதங்களில் கிடைத்த லாபத்தை விட 24.8 சதவீதம் கூடுதலாகும். அதேபோல, இக்காலாண்டுக்கான மொத்த வருவாய் 8.6 சதவீதம் உயர்ந்து 3.24 பில்லியன் டாலராக இருந்துள்ளது.