ஊழியர்கள் பணிநீக்கம்.. ஓலா எடுத்த முடிவு.. காரணம் என்ன?

அண்மைக்காலமாக பல்வேறு ஸ்டார்ட் அப் நிறுவனங்கள் தங்கள் ஊழியர்களை பணிநீக்கம் செய்து வருகின்றன. செலவுகளை குறைப்பதற்காக ஊழியர்களை பணிநீக்கம் செய்து வருவதாக ஸ்டார்ட் அப் நிறுவனங்கள் காரணம் கூறுகின்றனர்.

இந்த வரிசையில் தற்போது ஓலா (Ola) நிறுவனமும் ஊழியர்களை பணிநீக்கம் செய்ய முடிவு செய்துள்ளதாக தகவல் வெளியாகியுள்ளது. செலவுகளை குறைக்கும் நோக்கில் ஊழியர்களை வெளியேற்ற ஓலா முடிவு செய்துள்ளதாக கூறப்படுகிறது.

இதன்படி, பர்ஃபார்மன்ஸ் அடிப்படையில் எந்தெந்த ஊழியர்களை பணிநீக்கம் செய்யலாம் என்பதை கண்டறியும்படி சீனியர் ஊழியர்களுக்கு ஓலா தலைமை அறிவுறுத்தியுள்ளதாக தகவல் வெளியாகியுள்ளது. தற்போது ஓலா நிறுவனத்தில் சுமார் 1100 ஊழியர்கள் வேலை செய்து வருகின்றனர்.

Layoffs: 12,000 ஊழியர்கள் பணிநீக்கம்.. ஐடி ஊழியர்களுக்கு சிக்கல்!
இதில் சுமார் 500 ஊழியர்களை பணிநீக்கம் செய்ய ஓலா திட்டமிட்டுள்ளதாக தகவல் வெளியாகியுள்ளது. ஏற்கெனவே ஓலா நிறுவனம் தனது ஓலா கார்ஸ், ஓலா டாஷ் ஆகிய தொழில்களை மூடிவிட்டது. தற்போது ஓலா எலெக்ட்ரிக் நிறுவனத்தில் அதிக கவனம் செலுத்தப்பட்டு வருகிறது.

ஸ்டார்ட் அப் நிறுவனங்கள் பல்லாயிரக்கணக்கான ஊழியர்களை பணிநீக்கம் செய்வது குறித்து Crunchbase நிறுவனம் ஆய்வறிக்கை ஒன்றை வெளியிட்டுள்ளது. அதில், ஸ்டார்ட் அப் நிறுவனங்களில் சுமார் 12,000 ஊழியர்கள் பணிநீக்கம் செய்யப்பட்டுள்ளதாக கூறப்பட்டுள்ளது.

செலவுகளை குறைப்பதற்காக ஊழியர்களை பணிநீக்கம் செய்வதாக ஸ்டார்ட் அப் நிறுவனங்கள் காரணம் காட்டுகின்றன. ஆனால், ஸ்டார்ட் அப் நிதி திரட்டுதல் கடினமாகியுள்ளதாலும், ஸ்டார்ட் அப் நிறுவனங்களின் மதிப்பீடு குறைந்து வருவதாலும் ஊழியர்கள் பணிநீக்கம் செய்யப்படுவதாக இந்த அறிக்கை கூறுகிறது.