ஒரு ரூபாய் காசு செல்லாதா? இங்க ஈசியா மாத்தலாம்!

இந்தியாவில் இப்போது நிறைய வகையான நிறைய வடிவிலான நாணயங்களும் ரூபாய் நோட்டுகளும் புழக்கத்தில் உள்ளன. பழைய 500, 1000 ரூபாய் நோட்டுகளைத் தடை செய்த பின்னர் புதிய நோட்டுகளும் நாணயங்களும் புழக்கத்துக்கு வந்தன. இவை அதிகாரப்பூர்வமானதுதான் என்று ரிசர்வ் வங்கியே சான்றிதழ் கொடுத்தாலும் நிறையப் பேர் செல்லாது என்று கூறி வாங்க மறுக்கின்றனர்.

உதாரணமாக, 10 ரூபாய் நாணயங்கள் செல்லாது என்றே நிறையப் பேர் நினைத்துக் கொண்டிருக்கின்றனர். கடைகளில் பெரும்பாலும் இவற்றை வாங்குவதில்லை. 10 ரூபாய் நாணயங்கள் செல்லத்தக்கவைதான் என்று ரிசர்வ் வங்கியே பலமுறை விளக்கம் கொடுத்துள்ளது. ஆனாலும் அது செல்லாக்காசாவே இன்னும் புழக்கத்தில் உள்ளது. குறிப்பாக, கிராமப்புறங்களில் அவற்றை வாங்க மறுக்கின்றனர்.

இந்நிலையில் புதிய பிரச்சினையாக, இப்போது ஒரு ரூபாய் நாணயங்களும் செல்லாது என்ற வதந்தி பரவிக் கொண்டிருக்கிறது. நிறைய இடங்களில் ஒரு ரூபாய் நாணயங்களை வாங்க மறுப்பதாகப் புகார்கள் வந்துகொண்டிருக்கின்றன. எனவே இந்த ஒரு ரூபாய் நாணயத்தை எங்குதான் கொடுப்பது, அதை எப்படி மாற்றுவது என்ற குழப்பம் நிறையப் பேரிடம் இருக்கிறது.

10 ரூபாய் காசு செல்லாதா? மத்திய அரசு சொல்றதை கேளுங்கப்பா!
ஒரு ரூபாய் நாணயத்தை எங்கு மாற்றுவது என்று ட்விட்டரில் ஒரு பதிவிட்டிருந்தார். அதற்கு இந்திய தபால் துறை பதிலளித்துள்ளது. அதில், ரிசர்வ் வங்கியால் அச்சிடப்பட்டு புழக்கத்துக்கு விடப்பட்டுள்ள அனைத்து நாணயங்களும் ரூபாய் நோட்டுகளும் செல்லுபடியாகும் எனவும், அவற்றை தாராளமாக தபால் நிலையங்களில் மாற்றிக் கொள்ளலாம் எனவும் தெரிவித்துள்ளது.

இதுபோன்ற நாணயங்களையும் நோட்டுகளையும் வாங்க மறுக்கக்கூடாது என்று அனைத்து தபால் நிலையங்களுக்கும் உத்தரவிடப்பட்டுள்ளது. எனவே 10 ரூபாய், ஒரு ரூபாய் போன்ற நாணயங்கள் ஒருவேளை செல்லாது என்று கூறி வாங்க மறுக்கப்பட்டால் அவற்றை தபால் நிலையங்களில் மாற்றலாம். வங்கிகளும் இவற்றை மாற்றித் தருகின்றன.