Netflix: நெட்ஃபிக்ஸ் கட்டணம் குறைப்பு.. ஹேப்பி நியூஸ்!

நெட்ஃபிக்ஸ் (Netflix) உலகளவில் முன்னணி ஓடிடி நிறுவனமாகும். உலகம் முழுவதும் நெட்ஃபிக்ஸ் நிறுவனத்துக்கு சப்ஸ்கிரைபர்கள் இருக்கின்றனர். எனினும், கடந்த சில மாதங்களாக நெட்ஃபிக்ஸ் நிறுவனம் நெருக்கடியை சந்தித்து வருகிறது.

சப்ஸ்கிரைபர்களின் எண்ணிக்கை குறைவு, வருமானம் சரிவு போன்ற காரணங்களால் நெட்ஃபிக்ஸ் நிறுவனம் திண்டாடி வருகிறது. இதனால் நெட்ஃபிக்ஸ் பங்கு விலையும் சரிந்து வருகிறது.

சப்ஸ்கிரைபர்கள் இழப்பை சமாளிப்பதற்காக, குறைந்த கட்டணத்தில் விளம்பரங்களுடன் கூடிய திட்டத்தை அறிமுகப்படுத்த நெட்ஃபிக்ஸ் நடவடிக்கை எடுத்தது. மேலும், சப்ஸ்கிரைபர்கள் தங்களது பாஸ்வோர்டை (password) மற்றவர்களுடன் பகிர்வதை தடுக்கவும் முயற்சித்து வருகிறது.

இதெல்லாம் போக அமேசான் பிரைம், டிஸ்னி, HBO என போட்டியாளர்களின் எண்ணிக்கையும் அதிகரித்துவிட்டது. இதுவும் நெட்ஃபிக்ஸ் நிறுவனத்தின் இழப்புகளுக்கு முக்கிய காரணமாக உள்ளது.

நெட்ஃபிக்ஸ் நிறுவனத்தில் கட்டணம் உயர்வாகவே இருப்பதே மிகப்பெரிய பிரச்சினை என சப்ஸ்கிரைபர்கள் தரப்பில் கூறுகின்றனர். எனவே, ஒப்பீட்டளவில் குறைந்த கட்டணம் வசூலிக்கும் நிறுவனங்களுக்கு மாறிவிடுகின்றனர்.

இந்நிலையில், பல்வேறு நாடுகளில் சப்ஸ்கிரிப்ஷன் கட்டணத்தை குறைத்துள்ளதாக நெட்ஃபிக்ஸ் நிறுவனம் தெரிவித்துள்ளது. நெட்ஃபிக்ஸ் நிறுவனம் சுமார் 100க்கும் மேற்பட்ட நாடுகளில் இயங்கி வருகிறது. இதில் இலங்கை, மலேசியா, பிலிப்பைன்ஸ், வியட்நாம் உள்ளிட்ட 30க்கும் மேற்பட்ட குறிப்பிட்ட நாடுகளில் கட்டணத்தை 13% முதல் 60% வரை குறைத்துள்ளது நெட்ஃபிக்ஸ் நிறுவனம்.

எனினும், இந்தியாவில் தற்போது சப்ஸ்கிரிப்ஷன் (Subscription) கட்டணத்தை நெட்ஃபிக்ஸ் குறைக்கவில்லை. 2021ஆம் ஆண்டிலேயே நெட்ஃபிக்ஸ் நிறுவனம் இந்தியாவில் கட்டணத்தை குறைத்தது குறிப்பிடத்தக்கது.

கட்டணம் குறைப்பால் குறிப்பிட்ட சில நாடுகளில் மட்டுமே சப்ஸ்கிரைபர்கள் எண்ணிக்கை உயரும் என்பதால், மற்ற நாடுகளிலும் கட்டணத்தை குறைக்க வேண்டும் என்ற கோரிக்கையும் சப்ஸ்கிரைபர்கள் மத்தியில் எழுந்துள்ளது.

இதுமட்டுமல்லாமல், ஏற்கெனவே நெட்ஃபிக்ஸ் நிறுவனத்தின் வருமானம் குறைந்துள்ளதால் பங்கு விலை சரிந்துள்ளது. இந்த சூழலில், சப்ஸ்கிரிப்ஷன் கட்டணம் குறைக்கப்பட்டால் லாபம் மேலும் சரிந்து வருமானம் குறையும் என்பதும் குறிப்பிடத்தக்கது.