கோடையில் கொளுத்தும் முட்டை விலை.. பொதுமக்கள் அவதி!

நாமக்கல் மாவட்டத்தில் இன்று நடைபெற்ற தேசிய முட்டை ஒருங்கிணைப்பு குழு கூட்டத்தில் முட்டை ஒன்றின் பண்ணை கொள்முதல் விலையை 4 ரூபாய் 80 காசுகளில் இருந்து 5 காசுகள் விலை உயர்த்தி 4 ரூபாய் 90 காசுகளாக விலை நிர்ணயம் செய்யப்பட்டுள்ளது.

நாமக்கல் மண்டலத்தில் தினசரி முட்டை விலை நிர்ணயம் செய்யப்பட்டு வருகிறது. இந்நிலையில், கடந்த 3 நாட்களாக முட்டையின் விலை தொடர்ந்து அதிகரித்து வருகிறது. அதன்படி, கடந்த 3 நாட்களில் மட்டும் முட்டை விலை 15 காசுகள் வரை உயர்ந்துள்ளது.

இந்த விலை உயர்வு குறித்து பண்ணையாளர்கள் கூறுகையில், ”கோடைக் காலத்தில் நாமக்கல் மண்டலத்தில் முட்டை உற்பத்தி 10 சதவீதம் குறைந்துள்ளது. மேலும் பள்ளிகள் திறக்கப்பட உள்ளதால் சத்துணவிற்கும் முட்டை அனுப்பப்பட உள்ளது. இதனால் முட்டைக்கான தேவை அதிகரித்துள்ளதால் விலையும் உயர்த்தப்பட்டுள்ளது” என்று பண்ணையாளர்கள் தெரிவித்தனர். வரும் நாட்களில் முட்டையின் விலை மேலும் உயர வாய்ப்புள்ளதாகவும் அவர்கள் கூறியுள்ளனர்.

கடந்த மே 1ஆம் தேதி முதல் தேசிய முட்டை ஒருங்கிணைப்பு குழு நிர்ணயம் செய்யும் விலையிலேயே கோழிப் பண்ணையாளர்கள் முட்டையை விற்பனை செய்து வருகின்றனர். இதற்கு அனைத்து பண்ணையாளர்கள் மற்றும் முட்டை வியாபாரிகள் ஒத்துழைப்பு கொடுத்துள்ளனர். அதேபோல, ஏற்றுமதி செய்வதற்கான முட்டை விலையும் தனியாக நிர்ணயம் செய்யப்படுகிறது.

ஏற்றுமதியைப் பொறுத்தவரையில், நாமக்கல் மாவட்டத்தில் இருந்து தினமும் சுமார் 60 லட்சம் முட்டைகள் வெளி நாடுகளுக்கு ஏற்றுமதி செய்யப்படுகின்றன. அடுத்து வரும் நாட்களில் இந்தோனேசியா, இலங்கை, சிங்கப்பூர் போன்ற நாடுகளுக்கு முட்டையை அதிகளவு ஏற்றுமதி செய்ய வாய்ப்பு உள்ளதாக பண்ணையாளர்கள் தெரிவித்துள்ளனர்.