ரயில் பயணிகளுக்கு முக்கிய அறிவிப்பு.. ரயில்களில் இது கட்டாயம் தேவையா?

சொந்த ஊர்களுக்கும், தினசரி வேலை, கல்வி, சுற்றுலா போன்ற பல்வேறு காரணங்களுக்காக லட்சக்கணக்கான மக்கள் தினமும் ரயில்களில் பயணிக்கின்றனர். பேருந்து, விமானம், டாக்ஸி போன்ற போக்குவரத்து வசதிகளை விட ரயில் பயணத்தில் மலிவான கட்டணம், வசதியான பயணம் போன்ற அம்சங்கள் இருப்பதால் நிறையப் பேர் ரயில்களைத் தேர்ந்தெடுக்கின்றனர்.

ரயிலில் டிக்கெட் புக்கிங் செய்து பயணம் செய்யும்போது நிறையப் பேர் இந்தப் பிரச்சினையைச் சந்தித்திருப்பார்கள். TTR செக்கிங் வரும்போது ஆதார் கார்டு சரிபார்ப்பு செய்யப்படும். சில நேரங்களில் ஆதார் கார்டை எடுத்துச் செல்ல சிலர் மறந்துவிடுவார்கள். இதனால் அபராதம் போன்ற பிரச்சினையையும் சந்தித்திருக்கலாம்.

உண்மையில் ஆதார் கார்டைத்தான் கட்டாயம் எடுத்துச் செல்ல வேண்டுமா? ஆதார் கார்டு இல்லாமல் ஒரு சிலர் அந்த ரயில் பயணத்தையே கைவிட்டு விடுகின்றனர். இது தொடர்பான ரயில்வே விதிமுறை என்ன என்று நிறையப் பேருக்குத் தெரியாது. அதுபற்றி நீங்கள் கட்டாயம் தெரிந்துகொள்ளுங்கள்.

IRCTC விதிமுறைப்படி, ரயில் பயணிகள் 12 வகையான அடையாள ஆவணங்களை எடுத்துச் செல்லலாம். அதில் ஆதார் கார்டும் ஒன்று. அவ்வளவுதான். ஆதார் கார்டு இருந்தால் மட்டுமே ரயிலில் போகமுடியும் என்ற கட்டுப்பாடு இல்லை. ஆதார் கார்டு இல்லாவிட்டாலும் உங்களுக்கு பிரச்சினை இல்லை.

பாஸ்போர்ட், வாக்காளர் அடையாள அட்டை, டிரைவிங் லைன்சன்ஸ், பான் கார்டு, மத்திய - மாநில அரசுகள் வழங்கிய அடையாள அட்டை, மாணவர் அடையாள அட்டை, தேசிய மயமாக்கப்பட்ட வங்கியின் பாஸ்புக், புகைப்படம் அடங்கிய கிரெடிட் கார்டு, ஆதார் கார்டு, இ-ஆதார் கார்டு போன்ற ஆவணங்களை நீங்கள் கையில் எடுத்துச் செல்லலாம்.

சில டிஜிட்டல் ஆவணங்களும் ரயில்களில் ஏற்றுக்கொள்ளப்படுகின்றன. m-aadhaar மொபைல் ஆப்பில் உள்ள ஆதார் கார்டு ஏற்றுக்கொள்ளப்படும். அதேபோல, அரசின் டிஜி லாக்கர் ஆப்பில் 'issued document' பிரிவில் உள்ள ஆதார் கார்டு அல்லது டிரைவிங் லைசன்ஸை நீங்கள் காட்டலாம். ஆனால், 'uploaded document' பிரிவில் உள்ள ஆவணங்கள் ரயிலில் செல்லாது.

வெளிநாட்டவர்கள் இந்தியாவில் உள்ள ரயில்களில் பயணம் செய்யும் போது மேலே கூறிய ஆவணங்கள் எதுவும் அவர்களிடம் இருக்காது. அப்போது அவர்கள் தங்களது சொந்த நாட்டின் பாஸ்போர்ட் வைத்திருந்தால் போதும். இந்த ஆவணம் ஏற்றுக்கொள்ளப்படும்.