அதானிக்கு எவ்வளவு கடன் கொடுத்திங்க? வங்கிகளை விசாரிக்கும் ரிசர்வ் பேங்க்!

அதானி குழுமத்துக்கு கொடுக்கப்பட்ட கடன்கள் குறித்த விவரங்களை வழங்கும்படி இந்திய வங்கிகளுக்கு ரிசர்வ் வங்கி உத்தரவிட்டுள்ளதாக ராய்ட்டர்ஸ் ஊடகம் தகவல் வெளியிட்டுள்ளது.

அதானி குழுமம் கணக்கு மோசடி உள்ளிட்ட பல்வேறு மோசடிகளில் ஈடுபட்டுள்ளதாக அமெரிக்காவை சேர்ந்த ஹிண்டென்பர்க் நிறுவனம் கடந்த வாரம் ஆய்வறிக்கை ஒன்றை வெளியிட்டுள்ளது. இந்த அறிக்கையால் பெரும் பரபரப்பு ஏற்பட்டுள்ளது.

இதனால் ஜனவரி 25ஆம் தேதி முதல் அதானி நிறுவனங்களின் பங்குகள் கடுமையாக சரிந்துள்ளன. மேலும், உலக பணக்காரர்கள் பட்டியலில் 3ஆம் இடத்தில் இருந்து 15ஆம் இடத்துக்கு தள்ளப்பட்டுள்ளார் அதானி குழுமத் தலைவர் கவுதம் அதானி.

Adani stocks: அதள பாதாளத்தில் அதானி பங்குகள்.. குமுறும் பங்குதாரர்கள்!
அதானி நிறுவனங்களில் எல்ஐசி (LIC) நிறுவனம் பல்லாயிரம் கோடி ரூபாய் முதலீடு செய்துள்ளது. இதுபோக பொதுத்துறை வங்கிகளும் அதானி குழுமத்துக்கு நிறைய கடன் வழங்கியுள்ளன. குறிப்பாக எஸ்பிஐ வங்கி அதானி குழுமத்துக்கு அதிக கடன் வழங்கியுள்ளது. இதுபோக சில தனியார் வங்கிகளும் கடன் வழங்கியுள்ளன.

அதானி குழுமத்துக்கு நிறைய கடன்கள் இருக்கும் சூழலில், எல்ஐசி போன்ற பொது நிறுவனங்கள் ஏன் அதானியில் நிறைய முதலீடு செய்துள்ளன என்பது அண்மையில் பெரும் விவாத பொருளாகியுள்ளது. இதுமட்டுமல்லாமல், எஸ்பிஐ உள்ளிட்ட பொதுத்துறை வங்கிகள் அதிக கடன் வழங்கியதும் விமர்சனத்துக்குள்ளாகியுள்ளது.

தற்போது அதானி பங்குகள் கடும் வீழ்ச்சியை சந்தித்து வரும் சூழலில், அதானி நிறுவனங்களுக்கு இந்திய வங்கிகள் வழங்கியுள்ள கடன்கள் குறித்த விவரங்களை ரிசர்வ் வங்கி கேட்டுள்ளதாக தகவல் வெளியாகியுள்ளது.