தங்கத்தை வாங்கி குவிக்கும் ரிசர்வ் வங்கி.. பரபரப்பு தகவல்!

இந்திய ரிசர்வ் வங்கி (RBI) கடந்த பிப்ரவரி மாதத்தில் மட்டும் 3 டன் தங்கத்தை வாங்கியுள்ளதாக உலக தங்க கவுன்சில் (World Gold Council) தகவல் வெளியிட்டுள்ளது.

உலக தங்க கவுன்சில் வெளியிட்டுள்ள தகவல்படி, இந்திய ரிசர்வ் வங்கி கடந்த பிப்ரவரி மாதத்தில் 3 டன் தங்கத்தை வாங்கியுள்ளது. இதனால், இந்தியாவின் மொத்த தங்கம் கையிருப்பு 790.2 டன்னாக உயர்ந்துள்ளது.

தற்போது உலகின் ஒட்டுமொத்த தங்கம் கையிருப்பில் 8% தங்கம் இந்தியாவிடம் இருக்கிறது. உலக தங்க கவுன்சில் வெளியிட்டுள்ள தகவல்படி, 2022ஆம் ஆண்டு முதல் காலாண்டில் இந்தியாவின் தங்கம் கையிருப்பு 760.42 டன்னாக இருந்துள்ளது.

2022 இரண்டாம் காலாண்டில் இந்தியாவின் தங்கம் கையிருப்பு 767.89 டன்னாக உயர்ந்துள்ளது. 2022 மூன்றாம் காலாண்டில் தங்கம் கையிருப்பு 785.35 டன்னாக உயர்ந்துள்ள்ளது. 2022 நான்காம் காலாண்டில் தங்கம் கையிருப்பு 787.40 டன்னாக உயர்ந்துள்ளது.

இந்திய ரிசர்வ் வங்கி மட்டுமல்லாமல் மற்ற நாடுகளின் மத்திய வங்கிகளுக்கும் தங்கம் கையிருப்பு மிக முக்கிய பங்கு வகிக்கின்றன. அதற்காகவே ரிசர்வ் வங்கி போன்ற மத்திய வங்கிகள் மிக அதிகளவில் தங்கத்தை தங்களது கையிருப்பில் பாதுகாப்பாக வைத்திருக்கின்றன.

தற்போது இந்தியாவில் தங்கத்தின் மதிப்பு வரலாறு காணாத புதிய உச்சத்தை தொட்டுள்ளது. அமெரிக்க டாலர் மதிப்பு சரிந்ததே தங்கம் மதிப்பு உயர காரணமாக அமைந்துள்ளது. இதுபோக சர்வதேச வங்கி துறையில் ஏற்பட்டுள்ள நெருக்கடி, பொருளாதார அச்சங்கள் போன்ற காரணங்களாலும் தங்கம் உயர்ந்து வருகிறது.

எல்லா விதமான நெருக்கடி சூழல்களிலும் தங்கம் ஒரு பாதுகாப்பான முதலீடாகவும், சொத்தாகவும் கருதப்படுகிறது. எனவே, அபாய காலங்களில் கூட தங்கத்தின் மதிப்பு உயருகிறது.