கெத்து காட்டும் அம்பானி... ஆப்பிளுக்கு அடுத்து ரிலையன்ஸ்தான்!

இந்தியாவின் மிகப் பெரிய கோடீஸ்வரரும் உலக அளவில் ஐந்தாவது மிகப் பெரிய பணக்காரருமான முகேஷ் அம்பானி கால் வைக்காத துறையே இல்லை என்று கூறலாம். அந்த அளவுக்கு அனைத்துத் துறைகளிலும் ஆதிக்கம் செலுத்தி வருகிறார். இந்திய நெட்வொர்க் சந்தையில் முகேஷ் அம்பானியின் ரிலையன்ஸ் ஜியோ நெட்வொர்க் களமிறங்கிய மூன்றே ஆண்டுகளில் முதலிடத்தைத் தனதாக்கியது. இதுமட்டுமல்லாமல், தற்போது கொரோனா பாதிப்புகள் நிலவும் சூழலிலும் சர்வதேச அளவில் அதிக முதலீடுகளை முகேஷ் அம்பானி திரட்டி வருகிறார். ஜியோ மீட் என்ற புதிய வீடியோ கான்பெரன்ஸ் செயலி ஒன்றையும் சமீபத்தில் அறிமுகம் செய்திருந்தார்.

இந்நிலையில் ரிலையன்ஸ் இண்டஸ்ட்ரீஸ் நிறுவனம் புதிய சாதனை ஒன்றைப் படைத்துள்ளது. அதாவது, சர்வதேச அளவில் அதிக மதிப்பு மிக்க பிராண்டுகளுக்கான பட்டியலில் ரிலையன்ஸ் நிறுவனம் இரண்டாம் இடத்தைப் பிடித்துள்ளது. ஃபியூச்சர் பிராண்ட் நிறுவனம் வெளியிட்டுள்ள சர்வதேசப் பட்டியலில், அமெரிக்காவின் ஆப்பிள் நிறுவனம் முதலிடத்தில் இருக்கிறது. ரிலையன்ஸ் நிறுவனம் அனைத்துத் துறைகளிலும் ஆதிக்கம் செலுத்தி வருவதாகவும், புதிய கண்டுபிடிப்பு, வளர்ச்சி, சிறந்த வாடிக்கையாளர் சேவை உள்ளிட்ட பல்வேறு பிரிவுகளில் முன்னிலை வகிப்பதாகவும் இந்த ஆய்வில் தெரிவிக்கப்பட்டுள்ளது.

கொள்ளை லாபத்தில் ஜியோ... கலக்கும் அம்பானி!

ஆப்பிள், ரிலையன்ஸ் பிராண்டுகளைத் தொடர்ந்து, சாம்சங் மூன்றாம் இடத்திலும், விடியா நான்காம் இடத்திலும், மௌடாய் ஐந்தாம் இடத்திலும், நைக் ஆறாம் இடத்திலும், மைக்ரோசாஃப்ட் ஏழாம் இடத்திலும், ஏ.எஸ்.எம்.எல். எட்டாம் இடத்திலும், பேபால் ஒன்பதாம் இடத்திலும், நெட்ஃபிளிக்ஸ் பத்தாம் இடத்திலும் இருக்கின்றன. இந்த ஆண்டுக்கான பட்டியலில் புதிதாக 15 பிராண்டுகள் இணைந்துள்ளன. அதில் பேபால், தனாஹர், சவுதி அரோம்கா, அமெரிக்கன் டவர் கார்பரேசன் உள்ளிட்ட நிறுவனங்கள் அடக்கம். கொரோனா பிரச்சினை சர்வதேச அளவில் பெரிய தாக்கத்தை ஏற்படுத்தியிருந்தாலும் பட்டியலில் இடம்பெற்றுள்ள பிராண்டுகள் சிறப்பான வளர்ச்சியைக் கண்டுள்ளதாகவும் ஃபியூச்சர் பிராண்ட் நிறுவனம் தனது ஆய்வில் தெரிவித்துள்ளது.