விண்ணை முட்டும் வெங்காயம் விலை!

வெங்காயம் அதிகம் உற்பத்தியாகும் மகாராஷ்டிரா, கர்நாடகா உள்ளிட்ட மாநிலங்களில் சாகுபடி சமயத்தில் பெய்த கனமழையால் உற்பத்தி கடுமையாகப் பாதிக்கப்பட்டுள்ளது. இதனால் சந்தையில் வரத்து குறைந்து வெங்காயத்துக்கான தேவை அதிகரித்துள்ளது. நாட்டின் பல்வேறு நகரங்களில் வெங்காயத்தின் விலை முன்னெப்போதும் இல்லாத அளவுக்கு உயர்ந்து நிற்கிறது.

வெங்காய விலையைக் கட்டுப்படுத்த அரசு தரப்பிலிருந்து சில அதிரடி நடவடிக்கைகள் மேற்கொள்ளப்பட்டன. வெங்காயத்தை அதிகமான அளவில் இருப்பு வைக்கக்கூடாது, வெங்காய ஏற்றுமதிக்குக் கட்டுப்பாடு, வெங்காய இறக்குமதியை அதிகரித்தது போன்றவை அதில் அடக்கம். இதுபோன்ற நடவடிக்கைகள் மேற்கொள்ளப்பட்டாலும் வெங்காயத்தின் விலை குறையவே இல்லை. மாறாக, வெங்காய விலை நாளுக்கு நாள் அதிகரித்துக்கொண்டே செல்கிறது.

சென்னை, மும்பை, கொல்கத்தா ஆகிய நகரங்களில் வெங்காயத்தின் விலை கிலோவுக்கு 120 ரூபாயாக உயர்ந்துள்ளது. டெல்லி உள்ளிட்ட சில நகரங்களில் வெங்காயத்தின் விலை 140 ரூபாயாக உயர்ந்துள்ளதாக மத்திய நுகர்வோர் விவகாரங்கள் துறை அமைச்சகம் வெளியிட்டுள்ள அறிக்கையில் தெரிவிக்கப்பட்டுள்ளது. சில்லறை விற்பனையில் வெங்காயத்தின் விலை சராசரியாக ரூ.110 ரூபாயாக இருக்கிறது.

வெங்காய இறக்குமதியைப் பொறுத்தவரையில், எம்.என்.டி.சி. நிறுவனம் சார்பாக 21,000 டன் வெங்காயத்தை இறக்குமதி செய்வதற்கான ஆர்டர் கொடுக்கப்பட்டுள்ளது. ஜனவரி மாத மத்தியில் துருக்கி உள்ளிட்ட நாடுகளிலிருந்து வெங்காயம் இந்தியா வந்தடையும் என்று கூறப்பட்டுள்ளது. அதன் பின்னர் வெங்காய விலை இயல்பு நிலைக்குத் திரும்பும் என்று எதிர்பார்க்கப்படுகிறது.