கொரோனாவால் கார் விற்பனை வீழ்ச்சி!

பயணிகள் வாகனங்களுக்கான ஜூலை மாதத்தின் சில்லறை விற்பனை விவரங்களை ஆட்டோமொபைல் டீலர்கள் கூட்டமைப்பு வெளியிட்டுள்ளது. அதன்படி, சில்லறை விற்பனையில் மொத்தம் 1,57,373 வாகனங்கள் மட்டுமே ஜூலை மாதத்தில் விற்பனை செய்யப்பட்டுள்ளன. இது 2019ஆம் ஆண்டின் ஜூலை மாதத்தில் விற்பனையான வாகனங்களின் எண்ணிக்கையை விட 25.19 சதவீதம் குறைவாகும். கொரோனா பாதிப்பால் ஏற்பட்ட நிதி நெருக்கடி மற்றும் தேவை குறைவால்தான் இந்த வீழ்ச்சி ஏற்பட்டுள்ளதாக ஆட்டோமொபைல் டீலர்கள் கூட்டமைப்பு காரணம் தெரிவித்துள்ளது.

வாகனப் பதிவு சார்ந்த விவரங்களைக் கொண்டு இந்தத் தகவலை ஆட்டோமொபைல் டீலர்கள் கூட்டமைப்பு வெளியிட்டுள்ளது. மொத்தமுள்ள 1,445 பிராந்திய போக்குவரத்து அலுவலகங்களில் 1,235 அலுவலகங்களிடமிருந்து இந்த விவரங்கள் கிடைத்துள்ளன. இருசக்கர வாகனங்களுக்கான பதிவுகளைப் பொறுத்தவரையில், 2019 ஜூலை மாதத்தில் மொத்தம் 13,98,702 வாகனங்கள் விற்பனையாகியிருந்த நிலையில், இந்த ஆண்டின் ஜூலை மாதத்தில் விற்பனை எண்ணிக்கை 8,74,638 ஆகக் குறைந்துள்ளது. இது 37.47 சதவீத வீழ்ச்சியாகும்.

பொருளாதார வளர்ச்சி: மன்மோகன் சிங் அட்வைஸ்!

வர்த்தக வாகனங்கள் பிரிவில் 72.18 சதவீத வீழ்ச்சியுடன் 19,293 வாகனங்கள் மட்டுமே விற்பனை செய்யப்பட்டுள்ளன. 2019 ஜூலை மாதத்தில் இவற்றின் விற்பனை எண்ணிக்கை 69,338 ஆக இருந்தது. மூன்று சக்கர வாகனங்களைப் பொறுத்தவரையில், விற்பனை எண்ணிக்கை 17,92,879லிருந்து 74.33 சதவீத வீழ்ச்சியுடன் 11,42,633 ஆகக் குறைந்துள்ளது. ஒட்டுமொத்தமாக அனைத்து பிரிவுகளிலும் சேர்த்து ஜூலை மாதத்தில் மொத்தம் 11,42,633 வாகனங்கள் விற்பனை செய்யப்பட்டுள்ளன. இது 36.27 சதவீத வீழ்ச்சியாகும்.