3000 பேரை வேலையை விட்டு நீக்கும் ரோல்ஸ் ராய்ஸ்!

ஜெட் என்ஜின் உற்பத்தியில் பிரபலமாக இருக்கும் ரோல்ஸ் ராய்ஸ் நிறுவனம், விலை உயர்ந்த கார்களுக்கும் சர்வதேச அளவில் தனக்கென ஒரு இடத்தைக் கொண்டுள்ளது. ரோல்ஸ் ராய்ஸ் கார் வைத்திருப்பதையே மிகப் பெரிய கௌரவம் என நினைப்பவர்களும் உண்டு. அந்த அளவுக்கு ரோல்ஸ் ராய்ஸ் தயாரிப்புகள் இந்தியாவிலும் மிகவும் பிரபலமாக உள்ளன.

இந்நிலையில், ரோல்ஸ் ராய்ஸ் நிறுவனம் தனது செயல்பாடுகளை ஒழுங்குபடுத்துவதற்காக ஆயிரக்கணக்கான ஊழியர்களை பணிநீக்கம் செய்ய முடிவு செய்துள்ளது. இந்த பணி நீக்கத்திற்காக மெக்கின்சி & கோ தலைமையிலான நிபுணர்களை நியமித்துள்ளது.

ரோல்ஸ் ராய்ஸ் நிறுவனம் தனது உலகளாவிய பணியாளர்களில் இருந்து 3,000 உற்பத்தி அல்லாத ஊழியர்களை பணிநீக்கம் செய்ய பரிசீலித்து வருகிறது. நிறுவனத்தின் செலவுகளைக் குறைத்து வருமானத்தை அதிகரிக்கும் நடவடிக்கையில் ஒரு பகுதியாக, ரோல்ஸ் ராய்ஸ் நிறுவனத்தின் சிவில் விண்வெளி, ராணுவம் மற்றும் சக்தி அமைப்புகள் பிரிவுகளின் உற்பத்தி அல்லாத வணிகங்களை இணைக்க முடிவுசெய்யப்பட்டுள்ளது.

இந்தப் பணி நீக்கம் குறித்து ரோல்ஸ் ராய்ஸ் நிறுவனத்தின் அதிகாரி ஒருவர் கூறுகையில், "பல்வேறு பிரிவுகளில் மாற்றங்களைக் கொண்டுவரும் நடவடிக்கையில் ஈடுபட்டுள்ளோம். ஊழியர்களின் திறன் அடிப்படையில் அவர்கள் மீது இந்த நடவடிக்கையை எடுக்கவில்லை. நிறுவனத்தின் அடுத்த கட்ட வளர்ச்சி மற்றும் தொழில் விரிவாக்கத்துக்கான ஒரு திட்டமே" என்று கூறியுள்ளார்.

உதிரி பாகங்கள் பற்றாக்குறை, போதிய அனுபவம் வாய்ந்த தொழிலாளர்கள் இல்லாதது மற்றும் விமான இயந்திரங்களுக்கு டைட்டானியம் போன்ற பொருட்களை வழங்கும் ரஷ்யா மீது விதிக்கப்பட்ட பொருளாதாரத் தடைகளின் பின்னடைவு போன்ற காரணங்களால் உலகளாவிய விமானப் போக்குவரத்துத் துறை உற்பத்தி சார்ந்த சிக்கல்களை எதிர்கொள்கிறது. இதுபோன்ற பிரச்சினைகளைச் சமாளிக்க ரோல்ஸ் ராய்ஸ் நிறுவனம் இந்த கடினமான முடிவை மேற்கொண்டுள்ளது.