கிசான் கிரெட் கார்டு: 1.5 கோடிப் பேருக்குக் கடன்!

விவசாயிகள் அவசர தேவைக்காகக் கடன் பெறும் நோக்கத்தில் கிசான் கிரெடிட் கார்டு வழங்கப்படுகிறது. கிசான் கிரெடிட் கார்டு மூலம் உத்தரவாதமில்லா கடன்கள் குறைந்த வட்டியில் வழங்கப்படுகின்றன. கிசான் கிரெடிட் கார்டுகளுக்கான செயல்முறை கட்டணங்கள் உள்ளிட்ட பல்வேறு கூடுதல் கட்டணங்களை மத்திய அரசு ரத்து செய்துள்ளது. கிசான் கிரெடிட் கார்டுகள் மூலமாக விவசாயிகளுக்கு ரூ.2 லட்சம் கோடி வரை வழங்கப்படும் என்று ஊரடங்கு சமயத்தில் மத்திய அரசு அறிவித்திருந்தது. குறைந்த வட்டியில் விவசாயக் கடன் வழங்குவதற்காக கிசான் கிரெடிட் கார்டு கொடுக்கப்படுகிறது. இத்திட்டத்தின் கீழ் 2 சதவீத வட்டிக்குக் கூட கடன் வழங்கப்படுகிறது.

கொரோனா பாதிப்பைத் தொடர்ந்து தற்சார்பு இந்தியா திட்டத்தின் ஒரு பகுதியாக 2.5 கோடி விவசாயிகளுக்கு ரூ.2 லட்சம் கோடி மதிப்பிலான கடன் சலுகைத் திட்டத்தை மத்திய அரசு அறிவித்தது. வங்கிகள் மற்றும் நிதி நிறுவனங்களின் ஒருங்கிணைந்த முயற்சியால் விவசாயிகள், மீனவர்கள், கறவை மாடு வைத்திருக்கும் விவசாயிகள் என மொத்தம் 1.5 கோடி பேருக்கு இதுவரையில் ரூ.1.35 லட்சம் கோடி கடன் வழங்கப்பட்டுள்ளதாக மத்திய நிதியமைச்சகம் தெரிவித்துள்ளது. விவசாயிகளுக்குத் தேவையான கடனை உறுதி செய்வதால் கிராமப் பொருளாதாரமும், விவசாய உற்பத்தியும் அதிகரிக்கும் என்று அரசு தரப்பில் கூறப்பட்டுள்ளது.

2,000 ரூபாய் வேணும்னா உடனே இதைப் பண்ணுங்க!

விவசாயப் பணிகளை மேற்கொள்ளும்போது விவசாயிகளுக்கு சரியான நேரத்தில் கடன் வழங்க வேண்டும் என்ற நோக்கத்தில் கிசான் கிரெடிட் கார்டு எனப்படும் விவசாயிகள் கடன் அட்டைத் திட்டம் 1998ம் ஆண்டு அறிமுகம் செய்யப்பட்டது. கடன் தவணைகளை முறையாகச் செலுத்தும் விவசாயிகளுக்கு 3 சதவீத வட்டி மானியம் அளிக்கப்படுகிறது. அதனால் 4 சதவீத வட்டியில் விவசாயிகளுக்கு கடன் கிடைக்கிறது. இந்த கிசான் கிரெடிட் கார்டுகள் கடந்த 2019ஆம் ஆண்டில் கால்நடை விவசாயிகள் மற்றும் மீன் வளர்க்கும் விவசாயிகளுக்கும் நீட்டிக்கப்பட்டது. இதன் மூலம் அவர்களின் பிணை இல்லா விவசாய கடன் வரம்பு ரூ.1 லட்சத்திலிருந்து 1.6 லட்சம் வரை உயர்த்தப்பட்டது என்பது குறிப்பிடத்தக்கது.