தூள் கிளப்பும் சேவைத் துறை.. 2023 இன்னும் சூப்பரா இருக்குமாம்!

இந்தியாவின் சேவை துறை வளர்ச்சி கடந்த டிசம்பர் மாதத்தில் ஆறு மாத உச்சத்தை தொட்டுள்ளதாக S&P Global நிறுவனம் நடத்திய மாதாந்தர ஆய்வில் தெரியவந்துள்ளது.

டிசம்பர் மாதத்தில் சேவைத் துறைக்கு புதிய வேலைகள் கிடைத்ததாலும், சாதகமான சந்தை சூழல்களாலும் சேவை துறை நல்ல வளர்ச்சியை அடைந்துள்ளதாக இந்த சர்வே கூறுகிறது. S&P Global நிறுவனம் மாதம் தோறும் சேவை துறை குறித்து சர்வே நடத்தி வருகிறது.

இந்நிலையில், நவம்பர் மாதத்தில் 56.4 ஆக இருந்த PMI குறியீடு, டிசம்பர் மாதத்தில் 58.5 ஆக உயர்ந்துள்ளது. இது கடந்த ஆறு மாதங்களில் இல்லாத அளவுக்கு வளர்ச்சி ஆகும். மேலும், தொடர்ந்து 17 மாதங்களாக குறியீடு 50க்கு மேல் நீடித்து வருகிறது.

100 ஆண்டு பழைய நிறுவனம்.. அலேக்கா வளைத்து போட்ட அம்பானி
இந்த குறியீட்டின் அளவை பொறுத்தவரை, 50க்கு மேல் இருந்தால் வளர்ச்சி எனவும், 50க்கு கீழ் இருந்தால் சரிவு எனவும் மதிப்பிடப்படுகிறது. இதுகுறித்து S&P Global Market Intelligence நிறுவனம், “இந்தியாவில் சேவை துறை டிசம்பரில் நல்ல வளர்ச்சியை அடைந்துள்ளது. 2022ஆம் ஆண்டு இறுதிகட்டத்தை எட்டியபோது டிமாண்ட் மீண்டும் உயர்ந்ததால் சேவை துறை முன்னேற்றம் கண்டுள்ளது” என்று தெரிவித்துள்ளது.

2023ஆம் ஆண்டிலும் சேவை துறைக்கு நல்ல வாய்ப்புகள் இருப்பதாகவும், ஏராளமான நிறுவனங்கள் வளர்ச்சிக்கான வாய்ப்புகள் இருப்பதாக நம்பிக்கை தெரிவித்துள்ளதாகவும் S&P Global நிறுவனம் தெரிவித்துள்ளது.

2022 டிசம்பரில் சேவை துறையில் வளர்ச்சி அதிகரித்தது மட்டுமல்லாமல் டிசம்பரில் நிறைய வேலைவாய்ப்புகளும் உருவாக்கப்பட்டுள்ளதாகவும், இந்தாண்டில் இன்னும் நல்ல வளர்ச்சி கிடைக்கும் எனவும் சேவை நிறுவனங்கள் தெரிவித்துள்ளன.

S&P Global நிறுவனம் நடத்திய சர்வேயில் சேவைத் துறையை சேர்ந்த சுமார் 400 நிறுவனங்கள் பங்கேற்றன. இந்நிறுவனங்கள் அளித்த பதில்களின் அடிப்படையில் இந்த ரிப்போர்ட் தயார் செய்யப்பட்டுள்ளது.