சம்பளத்தை உயர்த்தும் நிறுவனங்கள்... இனி ஜாலிதான்!

இந்தியாவில் கொரோனா பரவலைக் கட்டுப்படுத்த மார்ச் மாத இறுதியில் நாடு தழுவிய ஊரடங்கு அமல்படுத்தப்பட்டது. பொதுமக்கள் அனைவரும் வீடுகளுக்கு உள்ளேயே முடங்கிக் கிடக்க உத்தரவிடப்பட்டது. தொழில் நிறுவனங்கள் அனைத்தும் இழுத்து மூடப்பட்டன. அனைவருக்கும் வேலை, சம்பளம் இல்லாமல் போனது. ஊரடங்கில் தளர்வுகள் அறிவிக்கப்பட்ட பின்னரும் வேலைவாய்ப்புகளும் சம்பளமும் போதிய அளவில் கிடைக்கவில்லை. கொரோனா பாதிப்பால் நிறுவனங்களுக்கு ஏற்பட்ட இழப்புகளை சமாளிக்க ஊழியர்களை வேலையை விட்டு நீக்குவது, சம்பளத்தைக் குறைப்பது போன்ற நடவடிக்கைகளில் நிறுவனங்கள் தொடர்ந்து ஈடுபட்டன.

இந்நிலையில் நல்ல சேதியாக, அடுத்த ஆண்டில் ஊதிய உயர்வு இருக்கும் என்று ஆய்வு ஒன்று நம்பிக்கையளித்துள்ளது. Aon நிறுவனம் சார்பாக சேலரி டிரெண்ட் சர்வே என்ற தலைப்பில் நடத்தப்பட்ட இந்த ஆய்வில், இந்தியாவில் உள்ள 87 சதவீத நிறுவனங்கள் வருகிற 2021ஆம் ஆண்டில் சம்பள உயர்வை அறிவிக்கும் என்று தெரியவந்துள்ளது. நடப்பு ஆண்டில் 71 சதவீத நிறுவனங்கள் மட்டுமே சம்பள உயர்வை அறிவிக்கும் என்று முந்தைய ஆய்வில் தெரிவிக்கப்பட்டிருந்தது. சம்பள உயர்வில், சுமார் 60 சதவீத நிறுவனங்கள் 5 முதல் 10 சதவீத சம்பள உயர்வை அறிவிக்கப்போவதாகத் தெரிவித்துள்ளன.

இந்தியாவில் சுமார் 20 தொழில் துறைகளில் 1,050 நிறுவனங்களிடம் நடத்தப்பட்ட ஆய்வில் இந்த முடிவுகள் கிடைத்துள்ளன. 2020ஆம் ஆண்டில் சம்பள உயர்வை அறிவித்த நிறுவனங்களில் மூன்றில் இரண்டு பங்கு நிறுவனங்கள் அடுத்த ஆண்டில் சம்பள உயர்வை வழங்கப்போவதாகத் தெரிவித்துள்ளன. சராசரி சம்பள உயர்வு 7 சதவீதம் வரையில் இருக்கும் என்று மதிப்பிடப்பட்டுள்ளது. இந்தியாவில் கொரோனா பாதிப்புகள் மிக மோசமாக இருந்தாலும், பொருளாதார வளர்ச்சி மிக மந்தமாக இருந்தாலும், பல்வேறு துறைகளைச் சேர்ந்த நிறுவனங்கள் விடாமுயற்சியுடன் செயல்படுவதாகவும், பணியாளர்கள் நலனில் அக்கறை செலுத்துவதாஅக்வும் Aon நிறுவனத்தின் தலைமைச் செயலதிகாரியான நிதின் செத்தி கூறுகிறார்.

ஐடி, வாழ்க்கை அறிவியல், மின்னணு வர்த்தகம், ரசாயனம், புரொபெசனல் சர்வைசஸ் போன்ற துறைகளில் சம்பள உயர்வு அதிகமாக இருக்கும் என்று இந்த ஆய்வு கூறுகிறது.