Green Bonds: பசுமை பத்திரங்கள் அடுத்த விற்பனை எப்போது? நல்ல வருமானம் கிடைக்கும்!

புதுப்பிக்கத்தக்க ஆற்றல், கார்பன் குறைப்பு, காலநிலை மாற்றம் உள்ளிட்ட பசுமை திட்டங்களில் முதலீடு செய்வதற்காக பசுமை பத்திரங்களை (Green Bonds) இந்திய அரசு அறிமுகப்படுத்தியது. இந்த பத்திரங்கள் விற்பனை வாயிலாக கிடைக்கும் தொகை பசுமை திட்டங்களில் முதலீடு செய்ய பயன்படுத்தப்படுகிறது.

முதற்கட்டமாக ஜனவரி 25ஆம் தேதி 8000 கோடி ரூபாய் மதிப்பிலான பசுமை பத்திரங்களை இந்திய அரசு விற்பனை செய்துவிட்டது. இதைத்தொடர்ந்து பிப்ரவரி 9ஆம் தேதி இன்னொரு 8000 கோடி ரூபாய் மதிப்பிலான பசுமை பத்திரங்கள் விற்பனைக்கு வருகின்றன.

பசுமை பத்திரங்களை ஏலம் வாயிலாக ரிசர்வ் வங்கி விற்பனை செய்கிறது. நடப்பு நிதியாண்டில் விற்பனை செய்யப்படும் 5 ஆண்டு பசுமை பத்திரத்துக்கு 7.10% வட்டியும், 10 ஆண்டு பசுமை பத்திரத்துக்கு 7.29% வட்டியும் வழங்கப்படுகிறது.

இந்நிலையில், வரும் 2023-24ஆம் நிதியாண்டில் செப்டம்பர் மாதத்துக்குள் அடுத்த பசுமை பத்திரம் விற்பனை நடைபெறும் என அதிகாரிகள் வட்டாரத்தில் தகவல் வெளியாகியுள்ளது. அடுத்த நிதியாண்டின் இரண்டாம் அரையாண்டில் மட்டும் 15000 கோடி முதல் 16000 கோடி ரூபாய்க்கு பசுமை பத்திரங்களை விற்பனை செய்ய மத்திய அரசு திட்டமிட்டுள்ளது.

இந்த பசுமை பத்திரம் விற்பனை வாயிலாக திரட்டப்படும் நிதி சோலார் மின்சக்தி, நீர் மின்சக்தி, காற்று மின்சக்தி உள்ளிட்ட புதுப்பிக்கத்தக்க ஆற்றல் மின்சக்தி திட்டங்களுக்கு பயன்படுத்தப்படும். பசுமை பத்திரங்கள் வாயிலாக திரட்டப்படும் நிதியை நிலக்கரி எடுப்பு, அனல் மின்சக்தி போன்ற திட்டங்களுக்கு பயன்படுத்த முடியாது.

வரும் நிதியாண்டில் மார்க்கெட் வழியாக எப்போதும் இல்லாத அளவுக்கு 15.43 லட்சம் கோடி ரூபாய் கடன் வாங்குவதற்கு பட்ஜெட்டில் திட்டமிடப்பட்டுள்ளது. ஆனால், இதில் பசுமை பத்திரங்களின் பங்கு எவ்வளவு என்பது பட்ஜெட்டில் குறிப்பிடப்படவில்லை.