LPG: அடுத்தடுத்து ஷாக்.. சிலிண்டர் விலை அதிரடி உயர்வு!

சட்டசபை தேர்தல் முடிந்தவுடன் பொதுமக்களுக்கு கஷ்ட காலம் தொடங்கிவிட்டது. எதிர்பார்த்தது போலவே பெட்ரோலியப் பொருட்களின் விலை உயரத் தொடங்கியுள்ளது. இன்று வெளியாகியுள்ள அறிவிப்பின்படி, மார்ச் 22 முதல் வீட்டு உபயோகத்துக்கான சமையல் எரிவாயு சிலிண்டர்களின் விலை 50 ரூபாய் உயர்த்தப்பட்டுள்ளது. கடைசியாக அக்டோபர் 6ஆம் தேதி எல்பிஜி சிலிண்டர் விலை உயர்த்தப்பட்டது.

இதற்கு முந்தைய மாதங்களில் ஐந்து மாநில சட்டசபை தேர்தலை கருத்தில் கொண்டு விலை உயர்த்தப்படாமல் இருந்து வந்தது. ஆனால் தேர்தல் முடிந்தவுடன் மானியம் இல்லாத சிலிண்டர் விலை உயர்ந்துள்ளது. சமையல் சிலிண்டர் விலை இன்று முதல் டெல்லியில் ரூ.949.5 ஆக உயர்ந்துள்ளது. முன்னதாக இதன் விலை ரூ.899.50 ஆக இருந்தது.

கொல்கத்தாவில், அக்டோபர் 6, 2021 அன்று, 14.2 கிலோ எடை கொண்ட மானியம் இல்லாத சிலிண்டரின் விலை 926 ரூபாயாக இருந்தது. இப்போது அதன் விலை 976 ரூபாயாக அதிகரித்துள்ளது. சென்னையில் சிலிண்டர் விலை ரூ 50 உயர்ந்து 967 ரூபாய்க்கு விற்பனை செய்யப்படுகிறது.

வாகன ஓட்டிகள் அதிர்ச்சி.. விலை உயர்ந்த பெட்ரோல்!

சர்வதேச சந்தையில் ரஷ்யா மற்றும் உக்ரைன் இடையே நிலவும் போர் காரணமாக கச்சா எண்ணெய் விலை அதிகரித்துள்ளதால் இந்தியாவில் இந்த விளைவு ஏற்பட்டுள்ளது. 2021 அக்டோபர் முதல் 2022 மார்ச் 1 வரை, வணிக பயன்பாட்டு சிலிண்டர்களின் விலை ரூ.275 உயர்த்தப்பட்டுள்ளது. அதே சமயம் 2021 மார்ச் 1 முதல் 2022 மார்ச் 1 வரை உள்நாட்டு எல்பிஜி சிலிண்டர்களின் விலை ரூ.81 மட்டுமே அதிகரித்துள்ளது. ஆனால் இப்போது அதற்கெல்லாம் சேர்த்து 50 ரூபாய் உயர்த்தப்பட்டுள்ளது.