பணத்தை எவ்வாறு கையாள்வது? இளம் பெண்களுக்கு சூப்பர் டிப்ஸ்!

பெண்கள் பெரும்பாலும் தங்களது வாழ்க்கையில் தங்களைச் சார்ந்த யாரேனும் ஒருவரை நம்பியே இருக்க வேண்டிய சூழல் இருக்கிறது. படித்த பெண்களும், நன்றாகச் சம்பாதிக்கும் பெண்களுக்கும் கூட இந்த நிலைமை இருக்கிறது. பொதுவாகவே, பெண்களுக்கு நிதிச் சுதந்திரம் என்பது தேவையான ஒன்றாக இருக்கிறது. நிதிச் சுதந்திரம் என்பது சம்பாதிப்பது, செலவு செய்வது, நிதியைக் கையாள்வது என்பனவற்றில் தாங்களாகவே முடிவெடுக்கும் அல்லது மற்றவரைச் சார்ந்திராமல் இருக்கும் நிலையாகும். திருமணம் ஆகாத இளம் பெண்களுக்கு நிதிச் சுதந்திரம் என்பது மிக முக்கியமான ஒன்றாகும். அவர்கள் தங்களது வாழ்க்கைப் பயணத்தில் பணத்தை எவ்வாறு கையாள வேண்டும் என்பது கட்டாயம் தெரிந்திருக்க வேண்டும்.

அமைப்பு சார்ந்த துறைகளில் வேலை கிடைக்க வேண்டுமென்றால் உயர் கல்வி என்பது மிக முக்கியமான ஒன்றாகும். இதன் மூலம் அதிகம் சம்பாதிக்க முடியும். எனவே இளம் பெண்கள் தங்களது வாழ்க்கையைத் தொடங்கும்போது உயர் கல்விகளுக்காகச் செலவிட்டு அதன் மூலம் பிற்காலத்தில் பயன்பெற வேண்டும். நிதியைக் கையாளுவதற்கு அடிப்படைக் கல்வி என்பது முக்கியம். அதற்கான அறிவும் திறமையும் அவர்களிடம் இருக்க வேண்டும். நீங்கள் ஒரு இளம் பெண்ணாக இருந்தால் அடிப்படையாக நிதியை எவ்வாறு கையாள்வது என்பதைத் தெரிந்துகொள்ள வேண்டும்.

முதலில் உங்களது வாழ்க்கையில் நிதித் தேவைகளையும் இலக்குகளையும் முன்கூட்டியே திட்டமிட வேண்டும். அது குழந்தைகளின் கல்வி, ஓய்வுக் காலத்துக்குப் பிந்தைய செலவுகள் போன்ற எதுவாக இருந்தாலும் அதற்கான நிதித் தேவைகளை முன்கூட்டியே திட்டமிட்டு தயார் நிலையில் வைத்திருக்க வேண்டும். இதில் முக்கியமான விஷயம் என்னவென்றால் பணவீக்கம் என்பது நாளுக்கு நாள் மாற்றமடைந்துகொண்டே இருக்கும் என்பதால் எதிர்காலத்துக்கான நிதித் தேவையில் நீங்கள் திட்டமிட்ட தொகையை விட அதிகமாகச் செலவிட வேண்டிய சூழல் ஏற்படவும் வாய்ப்புள்ளது. எனவே பணவீக்கத்தைப் பொறுத்து உங்களது திட்டமிடல் இருக்க வேண்டும். இதற்காக நீங்கள் ஒரு நிதித் துறை நிபுணரை அணுகியோ அல்லது நீங்களாகவே இணையதளங்களில் தேடியோ திட்டமிட்டுக்கொள்ளலாம்.

நீங்கள் சம்பாதிக்கத் தொடங்கியவுடன் சேமிப்பில் முதல் கவனம் செலுத்த வேண்டும். நீண்ட கால முதலீட்டுத் திட்டங்களிலும் குறுகிய கால முதலீட்டுத் திட்டங்களிலும் நீங்கள் சேமிக்க வேண்டும். நீங்கள் முதலீடு செய்வதற்காகக் கடன் வாங்க வேண்டும் என்ற அவசியமில்லை. உங்களது வருமானத்துக்கு ஏற்ப சிறிய தொகையாக இருந்தாலும் அதைச் சரியான முதலீட்டுத் திட்டத்தில் போட்டு பலன் பெறலாம். ரியல் எஸ்டேட், தபால் நிலையம், பங்கு முதலீடு, கடன் முதலீடு, ஆயுள் காப்பீடு உள்ளிட்ட பல்வேறு துறைகளில் உங்களது முதலீடு இருக்க வேண்டும். பங்கு முதலீடு என்பது மிகச் சிறந்த தேர்வாக இருக்கும். மியூச்சுவல் ஃபண்ட் திட்டங்கள் அதைவிடச் சிறந்தது.