100 ரூபாய் நாணயத்தின் விலை ரூ.18,000.. அதிர வைக்கும் ரேட்டில் காயின்கள்!

நேற்று டெல்லியில் புதிய நாடாளுமன்ற கட்டிடம் திறக்கப்பட்டது. இதை குறிக்கும் வகையில் புதிய 75 ரூபாய் நாணயங்களை பிரதமர் நரேந்திர மோடி வெளியிட்டார். இந்த நாணயத்தின் பின்புறம் புதிய நாடாளுமன்ற கட்டிடம் பொறிக்கப்பட்டுள்ளது. இந்த நாணயத்தின் எடை 35 கிராம்.

இதுபோன்ற சிறப்பு நினைவு நாணயங்கள் நேரடியாக புழக்கத்துக்கு வந்துவிடுவதில்லை. மாறாக இந்திய அரசின் https://www.indiagovtmint.in/ இணையதளத்தில் விற்பனைக்காக வைக்கப்படும். அதில் சொல்லப்பட்ட விலையை கொடுத்து நாணயங்களை வாங்க வேண்டும்.

தற்போது புதிய நாடாளுமன்ற கட்டிடத்துக்கான சிறப்பு நாணயம் இன்னும் விற்பனைக்காக பட்டியலிடப்படவில்லை. எனவே அதன் விலையும் இன்னும் தெரியவரவில்லை. விரைவில் 75 ரூபாய் நாணயத்தின் விலை என்னவென்பது தெரியவரும்.

எனினும், இதுபோன்ற நாணயங்களின் விலையை கேட்டால் அதிர்ச்சி ஏற்படுவதை தவிர்க்க முடிவதில்லை. ஏனெனில், இதற்கு முன் வெளியிடப்பட்ட நாணயங்கள் 18,000 ரூபாய்க்கு மேற்பட்ட விலை வரை விற்பனை செய்யப்படுகின்றன.

இந்திய அரசால் விற்பனை செய்யப்படும் நாணயங்களிலேயே மிக அதிக விலை கொண்டது, இயற்பியல் அறிஞர் ஹோமி பாபாவின் நூற்றாண்டு கொண்டாட்டத்துக்காக வெளியிடப்பட்ட 100 ரூபாய் நாணயம்தான். இந்த 100 ரூபாய் நாணயத்தின் மதிப்பு 18,561 ரூபாய்.

இதேபோல மற்ற நாணயங்களும் அதிக விலைக்கு விற்பனை செய்யப்படுகின்றன. உதாரணமாக முன்னாள் பிரதமர் நேருவின் தந்தை மோதிலால் நேருவின் 150ஆவது பிறந்தநாளுக்காக அறிமுகப்படுத்தப்பட்ட 150 ரூபாய் நாணயத்தின் விலை 10,890 ரூபாய்.

இதுமட்டுமல்லாமல், ஆங்கிலேயர் ஆட்சிக்கு எதிராக பஞ்சாபில் எழுந்த குகா இயக்கத்தின் 150 ஆண்டு நிறைவை கொண்டாடுவதற்காக அறிமுகப்படுத்தப்பட்ட 150 ரூபாய் நாணயம் 10,735 ரூபாய்க்கு விற்பனை செய்யப்பட்டு வருகிறது.